OEAK kërkon sqarime nga Qeveria për Kontratën Kolektive

Oda Ekonomike Amerikane në Kosovë (OEAK), kërkon nga Qeveria e Kosovës që të dal me sqarim zyrtar ligjor nëse Marrëveshja e Përgjithshme Kolektive është detyrimisht e zbatueshme nga të gjitha ndërmarrjet në Kosovë ose jo dhe çfarë vendimi do të duheshin marrë ndërmarrjet e caktuara në Kosovë të cilat nuk kanë dhënë akordimin e tyre përkitazi me marrëveshjen kolektive, meqë Ligji i Punës sipas Odës, e lë në diskrecion të kompanive të vendosin nëse do të marrin përsipër zbatimin e dispozitave të Marrëveshjes Kolektive.

Me fillimin e vitit 2015, kur edhe pritet të hyjë në fuqi Marrëveshja e Përgjithshme Kolektive, përfaqësues nga Oda Ekonomike Amerikane në Kosovë besojnë se kjo marrëveshje kolektive do të shtonte më tej presionin mbi sektorin privat, duke e ngadalësuar kështu rritjen e tij. “Marrëveshjet kolektive duhet të evitohen, pasi ato dekurajojnë kompanitë private që të rrisin numrin e punëtorëve si dhe e bëjnë Kosovën më pak atraktive në sytë e investitorëve të huaj potencial krahasuar me shtetet e rajonit,” thuhet në një komunikatë për medie të Odës.

ka shprehur shqetësimin e saj lidhur me paqartësitë që burojnë nga kjo kontratë që bart në vete obligime dhe detyrime shtesë nga ana e punëdhënësve. Një dokument i tillë sipas tyre, kërkon një vëmendje të veçantë nga të gjitha palët e interesit dhe detyrimisht kërkon një bazë të qartë ligjore.

“Lidhur me këtë, Oda Ekonomike Amerikane në Kosovë, pas konsultimit të kompanive të saj anëtare, përmes një shkrese dërguar Ministrisë së Punës dhe Mirëqenies Sociale në nëntor 2014, ka ngritur shqetësimin e saj mbi mospërputhshmërinë e disa neneve të marrëveshjes kolektive me Ligjit Themelor të Punës. Aq më tepër, detyrimi ligjor për zbatim të Marrëveshjes Kolektive nga ana e të gjitha ndërmarrjeve është në kundërshtim direkt me Nenin 90.5 të Ligjit të Punës, që ka të bëjë me palët që detyrohen të zbatojnë këtë kontratë, ku ceket se ‘Marrëveshja Kolektive vlen për ata punëdhënës dhe punëmarrës të cilët marrin përsipër detyrimet e përcaktuara me Marrëveshjen e tillë Kolektive’,” thuhet në komunikatë.

Ata shprehin shqetësimet që kanë të bëjnë me procedurën e aprovimit dhe nënshkrimit të Marrëveshjes Kolektive nga anëtarët e Këshillit Ekonomik Social, pa një procedurë paraprake të dialogut me kompani. Anëtarët e Këshillit Ekonomik Social nuk kanë të drejtë ligjore sipas tyre, që të fusin në obligime kontraktuale palët e treta, të paktën jo para se të merret autorizimi i tyre. Në rastin e marrëveshjes kolektive, ky dialog ka munguar dhe bizneseve iu është pamundësuar të shprehin pakënaqësitë e tyre./Telegrafi/