Nuk dorëzohen as në acar: Në ditën e 227-të qëndrojnë edhe në tendën që mërdhin (Foto)

Ndonëse netët në këtë kohë dimri janë të acarta, ish-punëtorët e fabrikës së Tubave nga Ferizaj, janë të vendosur që ta vazhdojnë grevën e tyre e cila tashmë ka hyrë në ditën e 227. Ata këmbëngulin se nuk do të zmbrapsen, deri sa t’i marrin 25 milionë eurot që u takojnë edhe sipas vendimit të Gjykatës.

Punëtorët grevistë kanë treguar se deri më tani nuk i ka vizituar as një zyrtarë i “Qeverisë së re”.
Njazi Asllani, kryetar i Këshillit Grevist, ka thënë për Telegrafin se tenda e vendosur në sheshë, afër Qeverisë së Kosovës, në të cilën ata qëndrojnë ditë e natë është shumë e papërshtatshme për të kaluar një ditë e lere më javë e muaj të tërë.

Ai ka sqaruar se në tendë janë 9 protestues aktivë, e që deri para pak ditësh kanë qenë 10 dhjetë, ku njëri nga protestuesit është larguar, për shkak se ka emigruar jashtë vendit.

“Mosha jonë nuk i duron këto temperatura, veçanërisht acarin e ditëve të fundit, temperaturat të cilat kanë shkuar deri në minus 15 gradë celsius. Më i riu ndër punëtorët është 67 vjeçar, ndërsa të gjithë të tjerët janë më të moshuar. Jemi të detyruar që të kërkojnë ndihmën e mjekut nga ftohje që kemi pësuar, e që për fat të mirë nuk kanë rezultuar të jenë tepër serioze”, ka theksuar Asllani, shkruan Telegrafi.

Edhe ndihmat të cilat i kanë ofruar ish- kolegët e tyre, sipas tij, kanë filluar të mbarojnë, për shkak të propagandës se Kryetarit të Sindikatës së fabrikës Tubave dhe Çelikut nga Ferizaj (IMK)- Ferizaj, Ali Azemi po kërkon që ata të mos ndihmohen me ushqime nga ish kolegët e tyre.
“Kryetari po ju thotë ish-kolegëve se greva ka përfunduar zyrtarisht, mirëpo ai këtë nuk e ka bërë në konsultim me ne, për çka edhe ne nuk pajtohemi më këto deklarata, sepse ne do të qëndrojmë deri në realizimin e kërkesave tona”, ka shtuar Asllani.

Ai ka shpresë edhe pse nuk beson shumë se Qeveria e re do të ketë në konsideratë dhe do ta zgjidh çështjen e punëtorëve të Fabrikës së Tubave.

“Më 15 dhjetor të vitit të kaluar, kemi bërë një kërkesë te kryeministri i Kosovës, Isa Mustafa, për tu takuar me të. Pastaj, në ditët e fundit të vitit që e lam pas, kemi qenë në Qeveri, ku na kanë premtuar se do ta trajtojnë çështjen tonë, por deri tani nuk kemi asnjë përgjigje”, tregon Njiazi Asllani. /Telegrafi/