Njerëzit e shoqërueshëm trashen, të brengosurit dobësohen

Njerëzit e shoqërueshëm shpesh janë të trashë, derisa tipat e brengosur sipas të gjitha gjasave janë të dobët, kanë publikuar rezultatet e një studimi shkencëtarët japonezë, të cilët kanë përcjellë marrëdhëniet në mes të personalitetit dhe masës trupore.

Më shumë se tridhjetëmijë njerëz në veri të Japonisë, mes moshës 40 dhe 64 vjeçare, janë përgjigjur në pyetjet mbi lartësinë dhe peshën dhe kanë zgjidhur testin e personalitetit, zbulon studimi që këtë muaj është publikuar në revistën shkencore, Journal of Psychosomatic Research.

Rezultatet kanë treguar se njerëzit e shoqërueshëm më shpesh se të tjerët e kanë indeksin më të madh të masës trupore për 25 %, që është definicioni i trashësisë i pranueshëm nga masa e gjerë, ka thënë udhëheqësi i studimit, Masako Kakizaki, nga Universiteti i Tokios.

Pas krahasimit të faktorëve tjerë, siç është pirja e duhanit, meshkujt e shoqërueshëm kanë pasur 1.73 herë më shumë gjasa që të preken nga trashësia, sesa ata të mbyllur. Ndërkaq te femrat e shoqërueshme përqindja është 1.53 herë më e madhe krahasuar me femrat e mbyllura.

Ata persona të cilët vlerësohen si të brengosur apo të shqetësuar, do të jenë dy herë më të trashë, ka vlerësuar studimi japonez.