Nisma “Expo Sud Italia”: Prodhuesit nga jugu i Italisë, “zbarkojnë” në Kosovë

Made in Italy është nënshkrimi që e shohim në shumë nga produktet konsumuese dhe të tekstilit në Kosovë. Kualiteti dhe besueshmëria e prodhimeve me këto etiketa, është mjaftë e kërkuar në Evropë. E, gjasat janë që ato të jenë më të pranishme në Kosovë.

Agjencia Italiane e Tregtisë – ITA (Italian Trade Agency – ICE), në organizim me Ambasadën e Italisë në Prishtinë, përmes një konference për media hapën sot nismën “Expo Sud Italia”.

Ky organizim është i pari i këtij lloji në Kosovë, me qëllim të intensifikimit të raporteve tregtare në mes të dy vendeve.

Kështu, nga nesër e deri më 14 shkurt, “Expo Sud Italia” mbledh dhe pret ekspertë të sektorit dhe konsumatorë, të cilët do të kenë mundësinë të njihen me të rejat që kompanitë e Jugut të Italisë (Calabria, Campania, Sicilia, Puglia) tek prezantojnë në sektorët: veshje, bizhuteri, artikuj për shtëpi, mobilieri dhe ndriçim.

Nisma do të jetë e ekspozuar në qendrat tregtare Ciaoberto, Grand Store, Minimax, Moda Italia në Prishtinë dhe në qendrën tregtare Nertili në Gjakovë,

Ambasadori i Italisë në Prishtinë, Andreas Ferrarese, në konferencën e sotme tha se kjo Agjenci ka për qëllim bashkëpunimin e sipërmarrjeve italiane me ato të Kosovës.

“Ky është një program që ka për qëllim bashkëpunimin e sipërmarrjeve italiane dhe atyre kosovare, e ku në këtë rast përfshihen Shqipëria dhe Kosova”, tha ambasadori italian.

Ferrerese tha se Ambasada që ai e udhëheq do të lejojë viza më afatgjate për biznesmenët që dëshirojnë të udhëtojnë në Itali lidhur me këtë çështje.

Ndërsa, përfaqësuesja e ICE, Manjola Mumajesi, tha se ky program ka për qëllim të promovojë ndërkombëtarizimin e kompanive të vogla.

Përndryshe, nisma “Expo Sud Italia” ka si qëllim krijimin e mundësive të reja për kompanitë pjesëmarrëse në këtë organizim dhe forcimin e bashkëpunimit mes prodhuesve nga Kosova dhe Italia. E gjitha kjo bëhet në kuadër të konsolidimit të raporteve ekonomiko-tregtare mes dy vendeve.

Vitet e fundit, në Kosovë është shënuar një shkëmbim tregtar gjithmonë e në rritje me Italinë, duke tejkaluar 300 milionë euro dhe me një peshë prej 11 për qind.

Investimet italiane në vend janë në rritje, veçanërisht në industrinë prodhuese, ndërtim dhe tregti. Vijojnë edhe sektori bankar e financiar, transporti, aktivitetet e hotelerisë dhe restoranteve, mjekësia dhe telekomunikacionet.

“Expo Sud Italia” është një vitrinë e cila, në një kohë të limituar, do të prezantojë mundësi të shumta bashkëpunimi dhe me benefite reciproke që dy vendet janë në gjendje të ofrojnë dhe të përftojnë. /KP/