Në sy të botës…!

Sa vijnë e rëndohen gjërat, sa vijnë e ngadalësohen proceset, katrahura dhe anarkia na kanë kapluar në çdo cep. Kjo si pasojë e politikës që zhvillohet në institucionet tona, duke filluar nga instancat më të larta shtetërore. Me të vërtetë kemi nevojë për një “heshtje politike” të përkohshme, siç ndodh heshtja parazgjedhore në prag të zgjedhjeve.

Po të hapim programet e lajmeve, gjithsesi do të shohim ndonjë veprim të pahijshëm në rrugë e institucione. Vallë çfarë po ndodh me ne? Kur do t’i vije fundi kësaj katrahure? Kur do të bëhemi ashtu siç u ka hije shqiptarëve, të bashkuar që t’ua fusim në palcë frikën “perandorive” të botës moderne, siç kemi ditur t’i bëjmë të dridhen perandori e mbretëri gjigante të kohës?! Kur do të jetë dita dhe koha jonë? Deri kur elita jonë do t’u prijë politikave të gabuara? Deri kur pozita dhe opozita do të jenë kaq larg njëra-tjetrës? Duhet humbur në humnerat e shpresës e të historisë për të gjetur këto përgjigje dhe vështirë se do të rezultojnë suksese.

Patjetër se duhet të vlejë parimi i demokracisë dhe secili të thotë atë që mendon dhe të veprojë atë që ia thotë zemra, por të bëhet në kohën e duhur, e jo të stagnohen proceset e rëndësishme për Kosovën. Me të vërtetë jemi në një situatë jo të mirë dhe në shekullin e ri ka kaluar koha që mosmarrëveshjet të zgjidhen me metoda tjera pos dialogimit, por çka është më e keqja ende tek ne pasqyrohen politika të vrazhda dhe me bindje jo paqësore.

Nuk bën të përzihet Kuvendi me Teatër dhe aty të zhvillohen skena dramatike. Nuk kemi nevojë të shohim pjesë teatrale në Kuvend dhe të qeshim me to. Në atë moment kur qytetari i Kosovës ka nevojë për argëtim, gjithsesi do të gjejë një rrugë apo vend për t’u argëtuar dhe jo të shikojë seancat e Kuvendit dhe të përmirësojë humorin e tij. Nuk është nevoja t’i tregojmë botës se çfarë dimë të bëjmë, por t’i tregojmë se dimë të jemi unikë në procese integruese, të bashkuar në vlera kombëtare e të përparuar në aspektin kulturor e të respektit.

Prandaj, duhet që para krenarisë ta kemi dashurinë dhe para kokëfortësisë ta kemi tolerancën…!