Modeli shqiptar në Lindjen e Largët (Video)

Amerika ka qenë dhe vazhdon të jetë një nga ëndrrat e njerëzve që synojnë suksesin, por vështirësitë për ta arritur atë janë shumë të mëdha në krahasim me vendet e tjera të botës.

E ndërsa shumë shqiptarë vazhdojnë të kërkojnë famën dhe suksesin në Amerikë, tregu aziatik vazhdon të jetë po ashtu një atraksion i vërtetë për personazhe të vendeve të ndryshme të botës, e edhe për shqiptarët.

Kjo për faktin se Kina dhe shumë vende të tjera aziatike janë të interesuara për modelimin evropian, e kohët e fundit shqiptarët janë ata që zënë vendin e parë në kërkimet kineze.

Jovan Tafa është modelisti shqiptar që po thyen tabu në Kinë, duke çmendur Azinë me format e tij fizike, raporton emisioni SOT i KTV-së.

Italia, duke qenë qendër me rëndësi për modën në botë, nuk ishte ajo që do t’i ofronte Jovanit mundësitë për karrierën që po e kërkonte. Këtë gjë ai e gjeti në Kinë, ku tash e disa kohë është shumë i kërkuar.

Në prill të vitit të kaluar ai ishte zgjedhur mashkulli i muajit për disa revista aziatike. Ai ka realizuar gjithashtu edhe një set, në të cilin shihet krejtësisht nudo.

Në të gjitha intervistat e tij, në vend dhe jashtë Shqipërisë, ai ka treguar prejardhjen e tij. Kjo për të është një mënyrë për të motivuar të gjithë për të aspiruar larg, pavarësisht sfidave me të cilat detyrohen të përballen.

Vendësit e tij nga Lushnja e shqiptarët në përgjithësi dhanë komentet e tyre për mënyrën që ka zgjedhur Jovani për të zhvilluar karrierën. Format trupore të tij kanë bërë që kompanitë e të brendshmeve të jenë më të interesuarat për to. Jovani i mirëkupton këto komente, duke qenë se e di që pamje të tilla ende mund të konsiderohen si tabu në shoqëritë tona.

Jovani tregon që vazhdimisht merr oferta nga shumë vende të botës për t’u bërë imazh i kompanive të ndryshme, por që ende nuk është gati të largohet nga Shangai.

Përveç punës, Jovani thotë se nuk ka një dashuri tjetër në zemrën e tij.

Jovan Tafa ka qenë pjesë e disa paraqitjeve televizive nëpërmes reklamave, për të cilat ai thotë se e kanë bërë të ndjehet mirë pasi që i pëlqen të aktrojë para kamerës.