Ministria e Shëndetësisë themelon Bordin Qendror për shkollim specialistik

Ministria e Shëndetësisë ka themeluar Bordin Qendror për shkollim specialistik, i cili do të ketë mandat 3 vjeçar.

Këtë lajm e ka bërë të ditur ministri i Shëndetësisë, Armend Zemaj, i cili ka thënë se zgjidhja e problemit të specializantëve është ndër prioritetet e tij si ministër.

“Sot themeluam Bordin Qendror për shkollim specialistik, me mandat 3 vjeçar, i cili do t’i përgjigjet Ministrit të Shëndetësisë. Qindra mjekë të diplomuar prej vitesh e kanë pritur këtë vendim që t’u mundësohet të ndjekin shkollimin e mëtejmë specialistik në fushën e mjekësisë. Që nga dita e parë si ministër e kam prioritet të zgjidhet njëherë e përgjithmonë problemi i specializantëve, që për vite të tëra nuk janë angazhuar në profesionin për të cilin kanë përfunduar studimet universitare dhe tash u duhet të ndjekin specializimet në fushat e preferuara të tyre”, shkruan Zemaj.

Zemaj përmes një postimi në Facebook ka thënë se me seriozitetin më të madh do të trajtojë kërkesat e mjekëve, infermierëve e profesionistëve shëndetësorë që këta të mos e braktisin Kosovën.

“Do t’i trajtoj me seriozitet të madh kërkesat e mjekëve, infermierëve e profesionistëve shëndetësorë që këta të mos e braktisin Kosovën. Këta janë pasuria jonë më e shtrenjtë, të cilët vendi ynë nuk duhet t’i eksportojë jashtë. Ta parandalojmë ikjen e trurit. Ta zhvillojmë Kosovën”, shkruan Zemaj. /Telegrafi/