Merkel e Gjermanisë mbron idenë e samitit BE-Putin

Kancelarja gjermane Angela Merkel të hënën mbrojti idenë e mbajtjes së një takimi të Bashkimit Evropian me presidentin rus Vladimir Putin, duke argumentuar se ai do të ofronte një mundësi për t’u përballur me Putinin me shqetësimet evropiane.

Por, siç shkruajnë mediat e huaja, përcjell Telegrafi, ideja u refuzua javën e kaluar nga anëtarët lindorë të BE-së.

Siç thuhet më tej, në një samit të premten, udhëheqësit e BE-së ranë dakord vetëm të “eksplorojnë formatet dhe kushtet e dialogut me Rusinë”,

Aty nuk u përmend asnjë takim i nivelit të lartë ose plane për një samit me Putin, një ide që Gjermania dhe Franca e kishin shtyrë.

Dhe rezultati pasqyroi ndarje të thella në qasjen e BE-së me 27 vende me Moskën.

Po sipas mediave të huaja, BE shqetësohet se Putini po bëhet gjithnjë e më autoritar dhe dëshiron të distancohet nga Perëndimi.

Si ajo, ashtu edhe aleanca ushtarake e NATO-s po përpiqen ta rikthejnë Rusinë në tryezë.

“Shqetësimi ishte që ne ndoshta nuk do të ishim në gjendje të krijonim një front të bashkuar, (dhe) një samit i tillë sigurisht që kërkon përgatitje shumë intensive”, tha Merkel në një seancë pyetje-përgjigje me ligjvënësit gjermanë dhe francezë.

Ajo tha se kjo do t’i lejojë evropianët “të adresojnë të gjitha pyetjet që na rëndojnë dhe gjithashtu ato për të cilat ne duam të bashkëpunojmë”.

Duke përmendur shqetësime të tilla si “sulmet hibride” me të cilat janë përballur Gjermania, Franca, Italia dhe vendet Baltike, Merkel shtoi: “është më mirë jo vetëm të flasim gjithmonë për këtë mes nesh, por të ballafaqohemi me presidentin rus me këto gjëra dhe të themi se bashkëpunimi i dobishëm nuk mund të ndodhë mbi një bazë të tillë”.

“Marrëdhënia midis Rusisë dhe Bashkimit Evropian nuk është me të vërtetë e mirë për momentin, por edhe në Luftën e Ftohtë kemi biseduar me njëri-tjetrin”, tha Merkel. “Kështu që unë mendoj se të mos flasësh nuk është e përshtatshme për zgjidhjen e problemeve”. /Telegrafi/