Me e pushtu… Kinën!

“Ne dhe Kina – 1.5 miliard”, brohoriste vetë me vete kryeministri e Shqipërisë, Edi Rama! Kur ishin shtatëqind milionë, shypja këndonte me mburrje për unitetin e pathyeshëm. Natyrisht, unë po spekuloj, se veç një Zot e di se çka e ngazëllen kryeministrin. Vetëm ideja e ngazëllimit, për ne në Kosovë, të cilët njihemi si totalisht të (ndër)kombëtarizuar, na lëndon shumë! Edhe Kina na zuri në befasi! Po na vë para aktit të kryem! Jo se nuk po arrijmë të korrigjojmë ende të kaluarën, por as të ardhmen… e ndritshme!

Sidoqoftë, për të gjitha pasojat, para historisë, i vetmi përgjegjës do të mbetet Edi! Përgjegjësi penale dhe morale nuk ka! Por, historianët me raste, sidomos solemne, do të përmendin emrat e tyre. E, këta do t’i ndjekë lemza, kudo që të jenë!

E ne, konform rrethanave, nuk na ka mbetet tjetër veçse me i shpallë luftë Kinës. Vijnë prej fundit të botës dhe po duan me na e marr Shëngjinin, përpara hundësh! Kështu inatosen kosovarët dhe nën vrullin luftarak e përmbysin… gotën! Nga dëshpërimi!

Pra, situata në kuptimin politiko-emocional paraqitet pak a shumë kështu: dikur “Sala” ua fali Shëngjinin vëllezërve kosovarë, e tash Edi po ua falë atë vëllezërve kinez. Jo se kosovarët e përdorën atë, por… ishte “lodra” jonë me të cilën na mashtroi Salua, kur po qanim! Edhe kryeministri kosovar e fali aeroportin dhe distribucionin, te vëllezërit turq. Trepçën po e mbajnë peng vëllezërit serbë. Rrush prej vëllezërve. Jemi familje e madhe!

Ndoshta kinezët, të llastuar pas bumit ekonomik, mund të thonë: duam Sarandën, apo Durrësin, jo Shëngjinin ?! Kush e do veriun? Këtu bashkohen me Maks Velon! Urrejtja e tyre për veriun mund të lexohet veç si një formë se si “ata” e shprehin dashurinë! Kështu shpëtojmë të gjithë.

Sidoqoftë, fjalën e (para)fundit e thotë Parlamenti! Pastaj, në fund fare, Kushtetuesja! Edhe Shqipëria ka Kushtetuese, sikurse edhe Kosova. Por, pa ndërkombëtarë! Vet shqiptarët përfaqësojnë shtete të ndryshme. Parlamenti, si organi më i lartë i pushtetit, është i paparashikueshëm, sikurse edhe qytetarët! Ndërkohë që kush e ka shumicën në Kushtetuese, ai është pushteti!

Po mendoja se, ndoshta më e lehtë do të ishte me i shpallë luftë Shqipërisë! Kina mundet mos me e pranu sfidën! Frika është e natyrshme për një superfuqi! Pastaj edhe përgjegjësia. E ne, sloganin “Shqipëria është Kosovë” mundemi me e vendos në hyrje të Kalimashit! Tuneli ynë!

U pa puna, po e pushtojmë Shqipërinë! Më së lehti e kemi verës! Por, a pushtohet Shqipëria nga shqiptarët, or vëlla?! Shqiptarë ka mjaftë edhe atje, por nuk po e pushtojnë dot, tash e njëqind vjet?!

OK, e zëmë se e pushtuam? Pastaj? Edhe Shqipëria do të bëhej jofunksionale, sikurse Kosova, dhe do të hyjë dhe nën patronatin ndërkombëtar! Edhe atje do të sundonin minoritetet, sepse shumica, për diçka do të jetë vazhdimisht e dyshimtë! Sidomos për shqiptarizëm! Por, pa dert! Këtë askush nuk mundet me e dëshmu.

E, strategjia jonë, duhet të jetë konspirative. Për të mund të debatohet vetëm në rrjete sociale. Kështu, të gjithë mendojnë se është shaka! Operacioni i koduar “Lakuriq” tregon se duhet me u masku, si turist! E, kur në Tiranë të bëhemi rreth një milion kosovarë, nuk mbetet tjetër veç me e zgjatë dorën e me i marrë institucionet. Ne e kemi dëshmu se dimë me institucionet. I bëjmë (jo)funksionale. Pastaj, gjithnjë e mbajmë rezervë edhe deputetin më të vjetër. E respektojmë edhe Kushtetuesen! Kushtetutën nuk e kemi lexu! Pse me e lexu kot! Krejt është çështje interpretimi! Gjykatësi amerikan dha dorëheqje sepse e pranoi se nuk ishte mjaft i mençur për me e kuptu Kushtetutën tonë të komplikueme. Ekspertët vendorë kanë shkruar Kushtetutën perfekte!

Se, na iku vegëza! Pas kthimit të Edit nga Pekini, hit i javës do të jetë kënga: “Ne dhe Kina 1.5 miliard”!

Mos të na e prek kush Kinën… se vdesim të tanë! Pak a shumë, kështu do të këndojnë reperët zyrtarë, në standard! E ku ka “rep” në standard, pash bukën?!

Por, anash emocionet nga e kaluara… Kina është superfuqi ekonomike dhe ne i duam superfuqitë. Me kë të bëhemi ne, ai bëhet superfuqi! Historia jonë është dëshmitare. A nuk u bëmë njëherë me Romën, Stambollin, Moskën, Pekinin, Uashingtonin, Brukselin dhe prapë… Kinën!

Nuk mendoj se ka diçka të keqe këtë biznes, sepse Kina komunisto-kapitaliste, e do një port në Ballkan, në kohën kur transporti detar është gjithsesi kryesori në tregtinë globale, por… më kapluan emocionet, or vëlla! Në Shëngjin nuk do të ndihem më si në shtëpi. Do të ndihemi sikur në Kinë. S’ka dyshim se duhet ndërruar strategjinë. Po na e morën Shëngjinin, fillimisht duhet pushtu Vlora dhe aty të ngritet flamuri kuqezi! Ai i kombëtares! 100 metra! Me e shpallë Shqipërinë të bërë dhe të mosvarme.

Në kohën kur edhe zogjtë kërkojnë një kabllo interneti për të pushuar pak krahët e lodhur, ne do të shpallim Pavarësinë dhe do të këndojmë për Salon që e fali dhe Edin që e mori, Shëngjinin! Krejt është epikë! Se zogjtë e tanë nuk janë çfarëdo! Fillimisht shqiponja! Pastaj edhe… Tuna!

Por, zgjidhje ka! Ne duhet të lidhim aleancë me Indinë. 2-300 milionë më pak nuk luajnë rol! Është fuqi India! Pastaj, veç ata kanë durim me u marrë me komplekset tona. Kështu, i madh e i vogël do të ushtrojmë joga! Fillimisht, kjo na duhet për me e duru vetveten. Pastaj për me e kuptu vetveten. Pastaj me u lëshu teposhtë Bjeshkëve të Nemuna e drejt në Vlorë!

Përnjëmend, më thoni, kush i pat nëmur këto Bjeshkët e Nemuna? Kur serbët ikën e kuptova që fajtore paskan qenë… patatet! E vetmja luftë që kishim ishte… luftë patatesh!

E ka kuptu, Edi! Kina është zgjidhja! Aq sa hamë ne patate për një vit, ata i qërojnë për dhjetë sekonda! Lobing, njeri lobing! Për “çështjen”!

Kështu, ata me Kinën, e ne me Indinë! Edi biznesin e ne durimin! Edi do të shkojë në Beograd së shpejti, e pastaj në Pekin! Apo ishte anasjelltas? Do të lobojë edhe për Kosovën! Krejt bëhet për “çështjen”!

Gjeopolitika është hartë, më thoshte një miku im, autor i një libri në shqip për gjeopolitikën! Pra, hartat përpara, o njerëz! Kujt po i biem: Tiranës apo Pekinit?