“MartyLeaks”

Pos 27 faqeve me 176 pika akuza, ish-prokurori i kantonit Tiçino në Zvicër, Dick Marty, në një sallë, në Avenynë Kleber të Parisit, 47 përfaqësuesve të Këshillit të Evropës kush e di se çfarë tjetër do t’u thotë.

Akuzat e tij, të lëshuara nga tellalli The Guardian, nuk janë të panjohura për publikun e Kosovës, ngase datojnë qysh moti. Akuzat e tij për “Shtëpinë e Verdhë” dolën shterpe. Por, edhe këto akuza të reja, tashmë të paketuara dhe të orkestruara në drejtim të Kryeministrit në largim, Hashim Thaçi, nuk duken serioze. Ndërlidhja e Thaçit me grupe kriminale dhe mveshja e epitetit të kryemafiozit të armëvve, drogës dhe organeve njerëzore, s’do mend se është tentativë e Martyt që ta njollosë luftën e UÇK-së dhe të eksponentëve të saj.

Zvicerani, i njohur si hulumtues i shumë aferave në Ballkan, prapa dyerve të mbyllura, do të përpiqet t’i bëjë për vete anëtarët e Këshillit të Evropës dhe t’ua mbushë mendjen se në Kosovë gjatë luftës dhe tash dominon krimi i organizuar, i udhëhequr nga kryeministri.

Por, akuzat e tij dhe të Carla del Pontes nuk kanë pasur dhe nuk kanë peshë, sepse Kosova ende nuk është pjesë e Këshillit të Evropës dhe kjo akuzë nuk është referencë juridike për Bashkimin Evropian, i cili tashmë e ka agjendën për Kosovën, pavarësisht daljes në sipërfaqe të këtij raporti kontradiktor.

Reagimet e Qeverisë së Kosovës ishin, mbase, voluminoze. Me një fjalë, është dashur t’i thuhet Martyt dhe “MartyLeaks”-it se kjo është deja vu dhe nuk komentohen hulumtimet e dështuara nga Carla del Ponte, e cila, po të kishte fakte, nuk do të hezitonte të procesonte për krimet që pretendon bashkëvendësi i tij, por, pasi u largua nga Tribunali i Hagës, me libër deshi ta njollosë UÇK-në dhe luftën e saj të drejtë.

Raporti ia hapi gojën madje edhe Beogradit. Vuk Jeremiqi, madje, e vuri në pikëpyetje të ardhmen e Thaçit. Por, në Ballkan, nuk janë shqiptarët kryemafiozë. Është dëshmuar se Stanko Subotiqi, Joca Amsterdami dhe Klani i Zemunit janë krerët e krimit edhe në Evropë, e edhe më gjerë.

Edhe gazetari i The Guardian, Paul Lewis, thotë se raporti është i besueshëm, por nuk e thotë gjykimin e tij real, vetëm bazohet në vokacionin e gazetarit. Ai pret debat interesant dhe të fortë të enjten, në Paris. Por, meqë mbledhja e Këshillit të Evropës do të jetë e mbyllur, nuk dihet se si do të vlerësohet raporti dyvjeçar i “MartyLeaks”-it.

Efekti i raportit nuk mund të jetë i përmasave të përmbytjes së etablimit të Kosovës si shtet, e as pretendentin për të udhëhequr qeverinë në mandatin e ardhshëm. Raporti i Martyt dhe libri i Pontes janë të vonuara dhe gjah i huqur, ngase është vështirë të mbulohen me fakte akuzat e ngritura nga dueti zviceran.