Legjendat e Xhylfatynit i mbijetojnë kohës

Me tre djemtë e saj është lëshuar në qendër të qytetit të Pejës, nga fshati Loxhë. Ka bërë nja 5 kilometra deri te destinacioni. Te Xhamia e Xhyfatynit.

Njëri nga djemtë e saj mban me vete “Abetaren”. Ka pak ditë që ka nisur viti shkollor dhe nëna nuk do “t’ia lërë asgjë rastit”.

Vendos të besojë në traditën e moçme, sipas së cilës, shkuarja në tyrbe, do t’i bënte hair djalit në shkollë. Dy djemtë e tjerë janë më të vegjël se ai që ka nisur shkollën, por nëna do të sigurohet edhe për të ardhmen e tyre. Dhe do t’i kryejë të gjitha adetet.

Abetaren e lë te dritarja e vogël e godinës që brenda ka varrin e gruas që vdiq e u varros aty më shumë se 300 vjet më parë. Merr nga bluza e djalit të saj një fije peri, e shkul atë me forcë dhe e lidhë për rrjetën e dritares së vogël, ku mbizotëron yndyra e kundërmon era e qirinjve. Prej tymit është nxirë gjithë korniza.

“E çka po bën kështu”, pyet djali i vogël gjithë kureshtje.
“Po e lidhi perin këtu se është mirë”, i përgjigjet e ëma, derisa ia ofron “Abetaren”. Shkon në murin e prapmë të objektit dhe ia ofron buzët. Thotë ca fjalë dhe bën sikur pështyn, për “t’i larguar të këqijat”.

Më tepër shpjegim se sa që i “kanë thënë se është mirë, i bën hair fëmijëve për shkollë”, kjo nënë e re nuk ka as për gazetë dhe nuk do që t’i përmendet emri.

Thotë që kjo është hera e parë që ajo vjen në këtë tyrbe, por e di se sidomos të premteve në kohën e drekës aty vijnë shumë hallexhinj. Për çkado që ua merr mendja se shpirti i “Princeshës së trëndafiltë” do t’u ndihmojë. /Koha Ditore/