Opinione

Kush po thotë se në LDK nuk ka reforma

PAH

Lidhur me çështjen e reformimit të brendshëm të LDK-së ka pasur një sërë prononcimesh nga individ e personalitete të ndryshme. Qasja e këtyre prononcimeve ka qenë e llojllojshme, por jo rrallë, ishte fare pak ose aspak e lidhur me realitetin. Pavarësisht kësaj, vlerësoj se megjithatë është mirë kur flitet për çështje, pra edhe për çështjen e reformave në LDK, sepse, në disa raste, ato mund të kenë edhe synime prosperuese për vetë LDK-në. Në fakt, lidhur me këtë çështje konsideroj se realiteti është ky. LDK po vazhdon dinjitetshëm kursin e reformave të nisura. Si të tilla, ato tashmë kanë hyrë në një proces dinamik dhe me shtirje të gjerë. Reformat filluan gjatë zgjedhjeve partiake që u zhvilluan në vitin 2010, dhe po vazhdojnë rrugëtimin e tyre pa asnjë pengesë institucionale.

Rezultatet e proceseve reformuese në Lidhjen Demokratike të Kosovës mundësuan:

1. Zgjedhjen e një lidershipi të ri dhe të përgjegjshëm me në krye Prof.dr.Isa Mustafën. Ky lidership, veçanërisht kryetari i LDK-së është ai që jo vetëm e ndali trendin e tatëpjetës së LDK-së, por bëri nismën e madhe të rikthimit të dinjitetit të saj- një ecje që vazhdon drejt rritës konsekuente.

2. Zgjedhjen e organeve drejtuese të LDK-së në përbërjen e të cilave, në të gjitha nivelet, do të zënë vend të meritueshëm dhe me ndikim personalitete që kanë emër në lëmin e shkencës dhe dijes përgjithësisht. Këta emra janë të shumtë shprehur në gjuhën e matematikës. Në lidhje me këtë vlen të theksohet fakti se në Kryesinë e LDK-së tashmë mbi 50% e anëtarëve janë emra të rinj. Një gjendje e tillë pothuajse reflektohet edhe sa i përket përbërjes së Këshillit të Përgjithshëm dhe përbërjes së organeve tjera të të gjitha niveleve.

3. Fillimin e një aktiviteti që ka synim zgjerimin e kursit të reformave edhe në çështjet programore: programin zgjedhor e qeverisës, platformën zgjedhore dhe rregullativën juridike. Për të përmbushur detyrat e rëndësishme në këto çështje, me propozim të Kryesisë së LDK-së Këshilli i Përgjithshëm ka themeluar grupet punuese përkatëse. Puna e këtyre grupeve është duke vazhduar sipas dinamikës së paraparë.

Reforma e brendshme ka rezultuar edhe me:

1. Sigurimin e një informimi efikas të opinionit publik lidhur me zhvillimet (aktivitetet) brenda LDK-së, në Kosovë dhe më gjerë. Bartëse e përgjegjësive për këtë është Zyra për Informim e cila është themeluar kohë më parë.

2. Sigurimin e një informimi efikas të brendshëm që vazhdon të realizohet përmes regjistrimit të anëtarësisë së LDK-së në kuadër të një programi unik kompjuterik.

3. Sigurimin e një reagimi të shpejtë e profesional ndaj dështimeve të Qeverisë dhe veprimeve të saj që dëmtojnë imigjin dhe interesat e Kosovës. Bartëse të këtyre aktiviteti janë ekipet e ekspertëve të themeluara kohë më parë. Aktiviteti i këtyre ekipeve të ekspertëve në vitin që e lamë pas ka qenë mjaft përmbajtjesor.

Ky proces reformimi ka ndikuar edhe në:

1. Shtimin e interesimit të të rinjve për të aderuar në LDK. Kjo vlerësohet të jetë rrjedhojë e faktit se lidershipi i LDK-së tashmë ka fiksuar nevojën e forcimit të rolit të brezit të ri brenda të gjitha strukturave partiake.

2. Shtimin e interesimit të qytetarëve madhor të të gjitha shtresave të popullsisë për tu anëtarësuar në LDK. Ky interesim është rezultat i përkushtimit të lidershipit të LDK-së që procesin e reformave ta trajtoj si një proces që vazhdon, e jo si një proces të mbyllur.

3. Shtimin e interesimit sidomos të anëtarësisë së LDD-së për tu kthyer në shtëpinë e vjetër. Ky proces rikthimi që është masivizuar kohëve të fundit është rezultat i trajtimit të barabartë që u bëhet atyre në LDK. Ky fakt argumentohet përmes krijimit të mundësive të realizimit të zgjedhjeve të reja brenda degëve gjegjëse kur ka aderime substanciale dhe kërkesa që vijnë nga organet legjitime. Shembull, tipik për këtë janë zgjedhjet e zhvilluara në Degën e LDK-së në Komunën e Vitisë, të cilat rezultuan me zgjedhjen e organeve të reja shumë reprezentative.

Këto dhe rezultatet tjera që pritet t’i sjellin proceset reformuese të brendshme të LDK-së kanë motivuar edhe më shumë lidershipin e kësaj partie që të jetë shumë aktiv dhe i përkushtuar që reformimin ta trajtoj vërtetë si një proces të hapur, dinamik, por gjithsesi brenda kornizës së vizionit rugovian.