Kosova eksporton para me të madhe

Gjatë periudhës janar-tetor importi i mallrave ka shënuar vlerën prej 2.02 miliardë eurosh, pavarësisht rënies prej 5 për qind. Ndërkaq mallrat e eksportit gjatë kësaj periudhe kanë arritur në vlerën 332 milionë euro.

Zëdhënësi i Doganës së Kosovës (DK), Adriatik Stavileci, ka treguar për gazetën “Epoka e re” se gjatë periudhës janar-dhjetor të këtij viti vlera financiare e importeve kap shumën e 2.02 miliardë eurove. “Sa i përket importit, krahasimi në mes të periudhës raportuese 2013-2014, për janar-tetor, pesha neto ka shënuar rënie prej 160,071,695.19 kg, shprehur në përqindje, -5 për qind. Kurse vlera në po të njëjtën periudhë ka pasur rritje të lehtë nga 1,9 miliard euro në 2.02 miliardë euro gjatë vitit 2014”, ka thënë Stavileci.

Sa iu përket eksporteve, ai ka bërë me dije se në periudhën raportuese 2013-2014, vlera e eksporteve ka pasur rritje prej 19,232,433.73 euro apo 12.32 për qind. “Në vitin 2013, në periudhën dhjetëmujore, kemi eksportuar 282,7 milionë euro, kurse në vitin 2014 janë eksportuar mallra me vlerë 332 milionë euro”, ka treguar ai.

Ndërkaq kryetari i Aleancës Kosovare të Bizneseve (AKB), Agim Shahini, ka thënë se 2014-ta karakterizohet si një vit i ngecjes ekonomike. “Ka ngecje në vëllim të importit dhe ka më pak import se një vit më herët, por në vlera financiare ka import më shumë sesa vitin e kaluar. Ne kemi import më shumë financiar dhe më pak në mënyrë vëllimore për 6 për qind. Arsyeja është e krizës institucionale, sepse qytetarët s’kanë konsumuar këtë vit aq shumë, shkaku i krizës dhe i kanë reduktuar dukshëm mallrat. Arsye të tjera janë: një pjesë është zëvendësuar me prodhim vendi, është luftuar informaliteti dhe Dogana e Kosovës ka rritur vlerat e importit në mënyrë të njëanshme”, ka bërë me dije Shahini.

Njohësi i çështjeve të biznesit, Lulzim Syla, ka deklaruar se rënia e vlerës së importit ka ardhur si rezultat i stagnimit të punëve ndërtimore pasi, sipas tij, materialët ndërtimore zënë vend të konsiderueshëm në import.

“Bazuar në të dhënat për import-eksportin, del se pesha e tyre mund të ketë rënë si rezultat i rënies së ndërtimeve, sepse produktet më me peshë, janë ato nga fusha e ndërtimtarisë, përfshirë materialet e ndërtimit dhe pajisjet në këtë fushë. Ndërsa rritje e lehtë mund të jetë shënuar te produktet ushqimore si rezultat i përgatitjeve për festat e fundvitit”, ka thënë Syla. /Telegrafi/