“Kosova e re” dhe “Brezovica” dyfishojnë rritjen ekonomike

Në projeksionet e Qeverisë e Kosovës për tre vjetët e ardhshëm rritja mesatare ekonomike është vlerësuar se do të jetë 4.2 për qind.

Kjo, sipas zyrtarëve qeveritarëështë normë më e ulët e parashikuar, pasi që me projektet, të cilat pritet të zbatohen rritja ekonomike do të jetë shumë më e lartë.

Ministri i Financave në Qeverinë e Kosovës, Avdullah Hoti, ka thënë për Radion Evropa e Lirë, se rritja ekonomike e parashikuar prej 4.2 për qind në vjetët e ardhshëm është e ulët dhe se me këtë normë të rritjes është vështirë të ulet papunësia e lartë.

Por, që sipas ministrit Hoti, kjo rritje ekonomike do të jetë edhe më e lartë.

“Kjo rritje ekonomike është brenda kontekstit ekonomik ekzistues, nuk përfshin efektet multiplikuese që mund të vijnë nesër prej projektit të termocentralit ‘Kosova e re’ ose prej projektit të ‘Brezovicës’, apo prej projekteve që ne po planifikojmë t’i financojmë me kredi përmes klauzolës për investimeve që e kemi në kuadër të programit me FMN-në”, ka thënë Hoti.

Ai ka treguar se këto dy projekte janë në zhvillim e sipër dhe që pritet vetëmtë konkretizohen dhe të fillojë zbatimi i tyre.

“Vetëm termocentrali ‘Kosova e re’, mund të sjellë mbi 1 milard investim të drejtpërdrejtë dhe mund të ketë efekte multiplikuese sa dyfishi i investimeve. Pas katër vjetësh mund ta rrisë Bruto Produktin Vendor në më shumë se 3 miliardë euro, që nënkupton rritje ekonomike për 50 për qind të GDP-së, për shkak të efekteve multiplikuese që ka në gjithë ekonominë”, ka sqaruar Hoti.

Rritjen ekonomike më të lartë që mund të vijë nga realizimi këtyre dy projekteve, nuk e kontestojnë as përfaqësuesit e komunitetit të biznesit, por ata thonë se ende nuk dihet se a do të konkretizohen këto projekte.

Kryetari i Odës Ekonomike të Kosovës, Safet Gërxhaliu, në një bisedë për Radion Evropa e Lirë, ka thënë se duhet të pritet momenti kur të Kosova do ta ketë dritën jeshile që këto projekte janë në binarë të realizmit.

“Është e vërtetë që në aspektin afatgjatë dhe afatmesëm ekzistojnë disa projekte madhore, siç është termocentrali ‘Kosova e re’ dhe privatizimi i kompleksit ‘Brezovica’, mirëpo besoj që për rrugën më të gjatë duhet të bëhet hapi i parë dhe hapi i parë është të dimë ku jemi”.

“Pra, duhet të pritet se çfarë do të ndodhë me Brezovicën, ndërsa sa i përket termocentralit ‘Kosova e re’ është e vërtetë që flitet dhe jemi prapë në pikën zero. Prandaj, është më e rrugës të bëjmë një plan dinamik ku dhe çka do të fillojë të realizohet”, ka theksuar Gërxhaliu.

Kompleksi “Brezovica” është një nga potencialet më të mëdha turistike që ka Kosova, si qendër e turizmit veror dhe dimëror.

Vitin e kaluar është privatizuar kjo qendër. Konsorciumi francez “MDP Consulting –Compagnie des Alpes” ishte shpallur fitues, me një çmim prej 409 milionë eurosh, nga të cilat 165 milionë pritet të investohen në tre vijetët e parë, kurse ka premtuar se do të krijojë 4000 vende të reja pune.

Derisa, termocentrali “Kosova e re” është një projekt, i cili ka filluar vite më pare. Ky projekt kishe pësuar ndryshime vit pas viti. Gati çdo vit është premtuar nisja e ndërtimit të tij, por deri më tani nuk ka asgjë konkrete.