Këtë vit definohet çështja e ndërtimit të Teatrit të Operës

Ministria e Kulturës, sivjet pritet të marrë një vendim lidhur me projektin për ndërtimin e Teatrit të Operës “Ibrahim Rugova“. Kështu ka bërë të ditur për KultPlus, zëdhënësja e kësaj ministrie, Jehona Shyti.

Ajo ka thënë se tashmë është planifikuar buxheti për vitin 2014, ndërsa shpreson që sivjet të mos ndodhë ridestinimi i mjeteve sikurse viteve të kaluara në projekte të ndryshme kulturore, por të merret një vendim konkret lidhur me Operën.

“Është planifikuar buxheti edhe për këtë vit fatkeqësisht edhe viteve të tjera kur është bërë ridestinimi i buxhetit është dashur që të ridestinohen në projekte të ndryshme të kulturës, shpresojmë që këtë vit të mos bëhet ridestinimi i mjeteve por të definohet çështja e atij projekti “, ka thënë Shyti.

Ajo ka shtuar se problemi i operës është i trashëguar dhe se realizimi i këtij projekti ka hasur në vështirësi të ndryshme.

Ministria e Kulturës e quan absurde mënyrën e deritashme të ndarjes së fondeve vjetore simbolike lidhur me Teatrin e Operës. Shyti thekson se ndër problemet më të mëdha rreth këtij projekti ka qenë mossigurimi i buxhetit.

“Njëra ndër absurdet në këtë projekt ka qenë pikërisht edhe planifikimi i buxhetit, është një projekt që kushton 30 milionë euro e që çdo vit janë ndarë nga 1 milion euro, e që sipas logjikës i bije që projekti të realizohet për 30 vjet. Kjo është e palogjikshme sepse kish me qenë kulmi 30 vjet më i ri se sa themelet, e ku i dihet që ndoshta mbas 30 vjetëve nuk do të kishte logjikë aspak”, ka theksuar Shyti.

Ministria e Kulturës vlerëson se afati maksimal për ndërtimin e objektit të operës duhet të jetë deri në pesë vjet. /KultPlus/Telegrafi/