Këshilltari i Mustafës: Fondi për punësim do të realizohet

Këshilltari politik i Kryeministrit Mustafa, Sokol Havolli, ka njoftuar përmes profilit të tij në Facebook, se Fondi i Investimeve dhe Punësimit, i premtuar gjatë fushatës elektorale nga partitë në pushtet, do të përmbushet. Postimin e tij mund ta lexoni të plotë më poshtë.

“Fondi i Investimeve dhe Punësimit do të realizohet dhe do të jetë nxitës i zhvillimit ekonomik në vend.

Grupi punues për hartimin e koncept-dokumentit për Fondin për Investim dhe Punësim është duke kryer punën e tij me qëllim që sa më shpejt të kemi strukturën më adekuate për funksionalizimin e këtij fondi.

Aktivitetet që jemi duke i ndjekur, përveç bazës që është nxjerrë nga Programi Qeverisës 2015-2018, janë edhe konsultimet tona me ekspert të ndryshëm vendor e ndërkombëtar si dhe me partnerët kryesor si USAID, UNDP, njësitë e ekonomisë të ambasadave të ndryshme dhe me të gjitha institucionet relevante.

Aktiviteti punës është duke ecur me ritëm mjaft të mirë dhe nuk jemi larg nga momenti i lansimit të shtyllave të cilat janë në fazë më të avancuar për funksionalizim. Si gjithherë, jemi të gatshëm që për këtë temë të flasim me publikun dhe mediat mbi progresin në baza të rregullta me qëllim që të ju informojmë drejt”.