Kampionët e botës gjunjëzohen para ‘tre luanëve’ (Video)

Miqësorja e luksit mes Anglisë dhe Gjermanisë përfundoi në dobi të britanikëve.

Gjermania para shikuesve të vetë në stadiumin olimpik të Berlinit ka pësuar humbje prej Anglisë me rezultat 2:3, në saje të një goli në kohën shtesë të mbrojtësit, Eric Dier.

Gjermanët gjatë gjithë pjesës së parë dominuan, ndërsa anglezët me kundërsulme të shpejta befasonin herë pas here kampionët e botës.

Mesfushori fantastik i Real Madridit, Toni Kroos ka realizuar golin e epërsisë së Gjermanisë kundër Anglisë. Mesfushori gjerman në minutën e 42-të të takimit dërgoi një goditje të fortë nga rreth 25 metra, të cilën nuk ka mundur ta ndal portieri anglez, Jack Butland.

Me këtë gol edhe përfundoi pjesa e parë e ballafaqimit miqësor mes anglezëve dhe gjermanëve, i cili po zhvillohet në stadiumin olimpik të Berlinit, raporton Telegrafi.

Por në pjesën u realizuan dy gola për tre minuta në takimin mes “pancerëve” dhe “tre luanëve”, ndërsa edhe dy gola të tjerë brenda 15 minuta para përfundimit të takimit.

Fillimisht, Mario Gomez ka ngritur epërsinë e kombëtares gjermane kundër Anglisë.

Sulmuesi shtatgjatë realizoi një gol me kokë në minutën e 57-të të takimit pas një harkimi të saktë të Sami Khediras.

Harry Kane iu përgjigj golit të Gomez në minutën e 60-të të ballafaqimit pas një solo aksioni brenda zonës së rreptësisë së gjermanëve.

Anglezët nuk u ndalën me kaq, pasi arritën të realizonin edhe dy gola.

Ishte Jamie Vardy, ai i cili debutoi me gol në kombëtaren e Anglisë. Sulmuesi i Leicecester City, Vardy shënoi super gol për anglezët në minutën e 74-të takimit dhe barazoi gjithçka në takimin e dy gjigantëve evropian.

Mesfushori anglez i Tottenham Hotspurs, Delli Alli i vetëm para portës së boshatisur pesë minuta para përfundimit të takimit nuk arriti të realizonte gol.

Por, atë që nuk e bëri Alli e bëri shoku i tij Eric Dier, i cili shënoi në kohën shtesë golin e fitores së ‘tre luanëve me rezultat, 2:3.

Para fillimit të ndeshjes mes këtyre dy kombëtareve, Mesut Ozil është laureuar si futbollisti i vitit i Gjermanisë për vitin 2015.

E gjithë kjo në saje të paraqitjeve fantastike të mesfushorit me skuadrën londineze të Arsenalit dhe kombëtaren gjermane, ku para dy viteve fitoi kampionatin botëror.

Pas këtij takimi, Gjermania dhe Anglia do të takohen të martën si vendas me Italinë, përkatësisht me Holandën. /Telegrafi/