iPad 2 po shkon “flakë”

Apple ka shitur më shumë se 5 milionë iPad gjatë muajit mars. Megjithatë, kjo kompani nuk po arrin t’i plotësojë kërkesat e tregut, kanë thënë zyrtarët e lartë të Apple gjatë prezantimit të të hyrave të mërkurën.

Drejtori financiar i kësaj kompanie, Peter Oppenheimer ka thënë se Apple nuk ka arritur ta plotësojë kriterin e saj për 4-6 javë pajisje rezervë, të cilën kohë dhe sasi ajo e preferon zakonisht.

“Ne kemi shitur çdo iPad 2 që kemi arritur të prodhojmë gjatë këtij tremujori, ndërsa do të dëshironim që këtë periudhë ta përmbyllim me rezerva në depo” ka thënë Oppenheimer.

Deri më sot, Apple ka shitur 4.67 milionë iPad në tërësi, duke përfshirë modelin e ri dhe atë të vjetër të këtij tableti.

Prej kësaj shitje, Apple ka arritur të gjenerojë rreth 2.8 miliardë dollarë të hyra, duke përfshirë edhe aksesorët që vijnë me këtë tablet.

“Kërkesa për iPad 2 ka qenë e papërballueshme, ka thënë Tim Cook, një tjetër zyrtar i Apple. “Unë do të dëshiroja që ne të kishim prodhuar më shumë iPad 2, pasi që sot ka shumë njerëz që duhet të presin ta kenë një të tillë” ka thënë ai. / Telegrafi /