HTC lanson modelin HTC Sensation?

Me sa duket, HTC do ta lansojë edhe një model të ri të telefonit, përkatësisht modelin HTC Sensation.

Edhe ky model thuhet se mbështetet në sistemin operativ Android, dhe i njëjti pritet të lansohet më vonë gjatë ditës së sotme, në një ngjarje speciale të cilën HTC e ka organizuar me mediat.

Edhe pse ky është një burim jo-zyrtar i informacionit, Qualcomm ka postuar një “cicërimë” në Twitter, në të cilën thotë se HTC Sensation posedon procesorin dy-bërthamor Snapdragon me 1.2GHz.

Mirëpo, Qualcomm nuk kanë qenë të vetmit që e kanë dhënë këtë informacion, pasi që rreth këtij modeli të ri të telefonit të HTC’së ka folur edhe Vodafone, ndërsa më pas e kanë fshirë postimin e tyre në rrjetin social.

Ne tashmë i kemi zbuluar disa nga specifikat e modelit të ri – HTC Sensation, ndërsa thuhet se edhe ky model posedon ekranin e ndjeshëm në prekje qHD me 4.3 inç, rezolucion 960 x 540 piksel, procesorin dual-core me 1.2GHz, Android 2.3 Gingerbread, ndërfaqen e veçantë, HTC Sense 3.0, si dhe 768MB RAM.

Duhet të presim deri në lansimin zyrtar të këtij modeli, për t’i konfirmuar të gjitha detajet, mirëpo sa më shpejtë që t’i kemi ato, ne do të ju informojmë. / Telegrafi /