Homazhe për poetin Ali Podrimja

E plotësuar: Në Akademinë e Shkencave dhe të Arteve të Kosovës që nga ora 12 kanë filluar homazhe për poetin Ali Podrimja. Përveç atyre me të cilët u shoqërua e bashkëpunoi, përveç miqve të fjalës së tij poetike, homazhe bënë edhe zyrtarë më të lartë vendit, të të gjitha institucioneve, të shoqatave dhe konfesioneve fetare.

Ishin edhe shumë bashkëqytetarë të fëmijërisë së tij nga qyteti i lindjes, Gjakova, si dhe nga të gjitha qytetet e Kosovës, njofton Koha.

Ata përveç nderimit me përkulje para arkivolit me trupin e pajetë të poetit kombëtar të madh, ngushëllonin edhe familjen.

Heshtja mortore thyhej nga zërat në sfond me vargjet e poetit kushtuar jetës, vdekjes, ngadhënjimit e lirisë, gjeografisë së atdheut nga Mitrovica deri në Çamëri, Ulqini e Presheva si dhe diaspora.

Ceremonia mortore do të zgjasë deri në orën 14, kur kortezhi do të niset për në varrezat e kryeqytetit, ku do të pushojë përgjithmonë, duke i falë kështu Prishtinës edhe emrin e madh me të cilin do të krenohet. Në orën 14 e 30 ai do të lëshohet në varrezën, shtëpinë e amshimit, për të lënë pas emrin e veprën e madhe që nuk vdes. /Telegrafi/

E plotësuar: Trupi i pajetë i Ali Podrimës arriti në tokën e Kosovës pikërisht në 8:35, në Aeroportin e Prishtinës “Adem Jashari”, nëpërmjet linjës ajrore “Swiss Air”, fluturim ky i nisur nga Zurich-u i Zvicrës për në Kosovë.

Djemtë e të ndjerit Podrimja kishin ndarë misionin e tyre për të atin, pikërisht për ditën e enjte, trupin e të cilit Petriti e kishte shoqëruar që nga vdekja e tij në Ladove të Francës e deri në aterrimin e aeroplanit në Prishtinë, për ta pritur këtu në Kosovë djali tjetër i Aliut, Dreni i shoqëruar së bashku me nënën Fitoren e motrën Donikën.

Nën lot po përcillnin me sy arkivolin me trupin e pajetë të Aliut të cilin po e nxirrnin nga aeroporti i Prishtinës për ta futur në makinën për funerale.

I mbuluar me flamurin kombëtarë shqiptarë, flamur që iu besua më pas djalit të Aliut, Drenit, arkivoli po përcillej edhe nga akademikët e Akademisë së Shkencave dhe të Arteve të Kosovës: Hivzi Islami, Mehmet Kraja, Rexhep Ismajli e Pajazit Nushi, varrim të cilin edhe e ka organizuar ky institucion i lartë i artit dhe i shkencës, anëtar i së cilës ishte edhe i ndjeri.

Pa asnjë fjalë, por me shumë dhimbje nga familjarët dhe akademikët prezent, por jo edhe përfaqësues të institucioneve shtetërore, trupi i pajetë i Ali Podrimës nga Aeroporti i Prishtinës është nisë për në drejtim të Akademisë së Shkencave dhe të Arteve të Kosovës, vend që i është rezervuar për homazhe prej orës 12: 00 deri në ora 14: 00, edhe pse, dera e Akademisë së Shkencave dhe e Arteve të Kosovës është hapur jo zyrtarisht për homazhe prej orës 10:00. /Zëri/Telegrafi/