Hap seancën vjetore, Parlamenti Kulturor Evropian

Seanca vjetore e Parlamentit Kulturor Evropian (ECP), sivjet mbahet në qytetin Girona të regjionit Katalan në Spanjë. Është ky edicioni i 14-të i institucionit kulturor panevropian që do të mbahet nga 30 tetor deri më 1 nëntor.

Ndërsa ndër temat e shumta që sivjet do të diskutohen në panele, do të jenë: mbështetja publike për kulturën, kriza multidimensionale evropiane, kreativiteti dhe identiteti kulturor regjional dhe ai global, artistët dhe organizatat e artit në debatin mbi nacionalizmin qytetar dhe identitetin etj.

Kosovën në këtë seancë do ta përfaqësojë Fatos Berisha, anëtar i ECP dhe drejtor artistik i PriFest.

“Është me rëndësi që përfaqësues nga Kosova të jenë prezent në Parlamentin Kulturor Evropian. Pasi unë jam i vetmi nga Kosova në këtë sesion të ECP, do të përpiqem të jap kontributin tim duke informuar anëtarët për zhvillimet kulturore në Kosovë”, ka thënë Berisha. “Po ashtu, do të jap informacione rreth aplikimit të Kosovës në UNESCO, rëndësinë dhe legjitimitetin e këtij aderimi. Pasi jam edhe shtetas i Kosovës dhe Shqipërisë e nuk kemi përfaqësues të Shqipërisë në ECP, do të tentoj të jap informacione edhe për Shqipërinë dhe skenën kulturore të këtij shteti”.

Sesioni i kaluar i Parlamentit Kulturor Evropian u mbajt në Prishtinë nën patronatin e ministrit të mëparshëm të Kulturës, Memli Krasniqi. /Telegrafi/