Gjakova mbi 20.2 milionë euro buxhet

Komuna e Gjakovës vitin 2015 e ka nisur me një buxhet në vlerë prej 20 milionë e 269 mijë euro. Prej kësaj shume të hyrat nga grandi i qeverisë kapin shumën prej rreth 17 milionë e 243 mijë euro, ndërkohë që mbi 3 milionë euro janë mjete të parapara të realizohen nga të hyrat vetanake të komunës.

Sipas Teki Shalës, drejtor i Drejtorisë komunale për Buxhet e Financa në Gjakovë, buxheti i vitit në vijim është përgatitur sipas kategorive ekonomike buxhetore, ndërkohë që për herë të parw, ky buxhet është hartuar mbi bazën e buxhetimit gjinor, që nënkupton se gjatë financimit të projekteve të ndryshme kujdes i posaçëm do t’i kushtohet faktit që nga ky financim në mënyrë të barabartë të përfitojnë të dy gjinitë.

Në anën tjetër, sipas drejtorit Shala, gjatë vitit 2015 komuna për shkak të limiteve buxhetore, përkatësisht borxhit të madh të trashëguar gjatë viteve të kaluara, nuk do të jetë në gjendje t’i realizoi të gjitha kërkesat për projekte kapitale, raporton Radio Gjakova

Në këtë drejtim prioritet do të kenë projektet e nisura në vitet e mëparshme si dhe projektet me bashkëfinancim, ndërkohë që përparësi në realizimin e kërkesave për projekte të ndryshme do të kenë edhe rajonet, përkatësisht lagjet të cilat e kryejnë me rregull obligimin për tatimin në pronë. /Telegrafi/