Gati për edicionin e ri të festivalit “Skulpfest”

Festivali ndërkombëtarë i skulpturës “Sculp Fest” është i pari dhe i vetmi i tillë jo vetëm në Kosovë por edhe në tërë Ballkanin. Sculp Fest është emri gjeneral i projektit i cili ndahet në tre departamente / festivale: Sculp’ice, Sculp’edu dhe Sculp’biennale. Përderisa dy të parat (Sculp’ice dhe Sculp’edu) zhvillohen çdo vit, Sculp’biennale do të mbahet çdo dy vite dhe do te startoje ne vitin 2016.

Ekipi i festivalit njofton të gjithë adhuruesit e artit të skulpturës dhe arkitekturës që përgatitjet për edicionin e ri kanë përfunduar. Festivali edukativ Sculp’edu do të zhvillohet me 18-22 shtator në Prizren me aktivitete të ndara në tre grupmosha. Në kuadër të festivalit të rinjët e moshave të ndryshme do të kenë mundësinë e ndjekjes së punëtorive si.

“Punëtori me fëmijët e shkollave fillore, ku përmes demonstrimit të teknikave të ndryshme, dhënies së informacionit mbi skulpturën dhe artin në përgjithësi do të synohet të nxitet kreativiteti i tyre. Fëmijët do te skulpturojnë ne baze të temave për ‘trashëgimi kulturore’ dhe ‘barazi gjinore’. Aktivitetet e këtij lloji dhe me këto tema do të zhvillohen për herë të parë në vend dhe kjo ndodh për shkak të mungesës se edukimit në këto tema në shkollat fillore”, thuhet në komunikatën për media.

Punëtori me nxënësit e shkollave të mesme, sipas organizatorëve do të bëhet përmes ligjëratave që kanë për qëllim përgatitjen e tyre për të studiuar në universitete vendase dhe ndërkombëtare të artit. “Njoftimi i tyre me profesionin si artist dhe shume tema tjera që do të shtjellohen në punëtori dhe ligjërata nga artiste, profesorë dhe psikologë vendas dhe të huaj”.

Ndërkaq punëtoria me studentët që studiojnë artet aplikative dhe arkitekturën përmes zhvillimit të ligjëratave nga profesorët ndërkombëtarë dhe vendas të cilët do t’i ndajnë përvojat në jetën e tyre si artistë profesionist. “Në kuadër të aktiviteteve vlen të veçohen: për herë të parë në Kosovë do të punohet një miniaturë (makete skulpture) e qendrës historike të Prizrenit, ligjërata për konservim dhe punëtoria lidhur me fasadat e objekteve të qendrës historike të Prizrenit, artist talk nga disa artiste nga regjioni i Ballkanit, ligjëratë me temën “Runing Past” dhe shumë aktivitete tjera që do të zhvillohen nga profesorë vendas dhe të huaj për emrat e të cilëve do t’u njoftojmë në ditët në vijim.

Ndërkaq debati i cili do ta shtjelloje po ashtu temën lidhur me trashëgimi kulturore te quajtur “Kur do te pushoje ky degradim?” do të zhvillohet ne bashkëpunim me RrOK Prizren dhe Forumin Kulturor. Struktura urbane e Prizrenit, e sidomos e zonës historike është duke u transformuar si pasojë e aktivitetit degradues urbanistik në dhjetë vitet e fundit. Kjo veprimtari është duke e shkatërruar trashëgiminë kulturore dhe potencialin turistik të qytetit. Paneli është menduar si intervenim për të diskutuar politikat lokale dhe qendrore për mbrojtjen e zonës historike të Prizrenit, si dhe përgjegjësinë qytetare për të mbrojtur qytetin nga degradimi.

Ne edicionin e dytë të festivalit Sculp’edu kryesisht do të shtjellohet tema për Trashëgimi Kulturore. Ky edicion është vetëm pikënisje për shumicën e aktiviteteve të cilat do të zgjasin 3 vite dhe për herë të parë do të ekspozohen ne Sculp’Biennale që do të mbahet ne verë të vitit 2016. /Telegrafi/