“Future is Here” hap dyert e botës së filmave dokumentarë për regjisorët e rinj

Programi “Future is Here” që zbatohet prej më shumë se një dekade nga DokuFesti, në edicionin e fundit, ka mbledhur 10 pjesëmarrës të rinj në kampin shtatë ditor, për ti mbështetur në hapat e parë të hyrjes në botën e filmave dokumentarë kreativë.

I konceptuar si më shumë se një punëtori për realizimin e filmave, Future is Here sipas njoftimit të DokuFest, është një  udhëtim transformues ku pjesëmarrësit eksplorojnë teknikat e rrëfimit, artin vizual dhe  mendimin kritik, ndërsa promovojnë bashkëpunimin dhe shprehjen e vetvetes.

Programi përqendrohet në mësimin praktik, ku pjesëmarrësit përfshihen aktivisht në çdo fazë të procesit të  realizimit të filmit, nga konceptimi i ideve deri te montazhi. Duke i bashkuar regjisorët e rinj  me mentorët me përvojë dhe ish-pjesëmarrësit, programi krijon një hapësirë unike për  zhvillimin e aftësive, vetëbesimit dhe lidhjeve kuptimplota, raporton Telegrafi.

Edicioni i fundit ka përmbajtur ligjërata, punëtori dhe përvoja praktike të realizimit të  filmave.

“Të udhëhequr prej regjisorëve më të njohur të Kosovës dhe ekspertëve të industrisë, pjesëmarrësit u zhytën thellë në artin e filmbërjes, duke krijuar storie personale që rezonojnë si në nivel lokal ashtu edhe universal”, thuhet në njoftimin e DokuFest.

Erlisa Buzhala, një nxënëse e shkollës së mesme nga Prishtina, si pjesëmarrëse ka ndarë përvojën e saj transformuese në këtë program.

“Ishte një hapësirë ku kreativiteti, ndjeshmëria dhe pasioni u bashkuan. Të ndaja historinë time për të jetuar me aftësi të kufizuar ishte shumë personale, por mbështetja e palëkundur që mora e shndërroi atë në një kujtim kuptimplotë. Mentorët tanë nuk dëgjuan thjesht, ata besuan në idetë tona dhe na ndihmuan t’i sjellim në jetë”, ka thënë ajo.

Mjedisi intim, sipas njoftimit, u ka mundësuar këtyre filmbërësve të rinj që të ndajnë tregimet e tyre, të lidhen me bashkëmoshatarët dhe të zhvillojnë aftësitë e nevojshme për të sjellë vizionet e tyre në ekran.

Udhëhequr nga regjisorët Dea Gjinovci, Leart Rama dhe producenti Eroll Bilibani, programi  kombinon trajnimin teknik dhe mentorimin me rritjen emocionale dhe sociale.

Leart Rama, i cili ka ndjekur këtë program që në  vitin 2015, ka reflektuar mbi  ndikimin unik të tij.

“Kjo nuk është thjesht një  shkollë; është një shtëpi e  përhershme për rritje krijuese,  inovacion dhe lidhje  kuptimplota. Është një thesar  për këdo që fillon udhëtimin e  tij në rrëfimin e historive,  kinematografi dhe eksplorimin e potencialit krijues.” “Si mentor, tani shoh  evolucionin e jashtëzakonshëm  në mënyrën se si brezat e rinj i  qasen artit, jetës dhe fuqisë së  rrëfimit vizual”, ka deklaruar ai.

Programi sipas njoftimit të DokuFest gjithashtu ka përfshirë punëtori dhe masterklasa të udhëhequra nga regjisorët si Norika  Sefa, Ilir Hasanaj, Samir Karahoda, montazheri Enis Saraçi dhe të tjerë, që ligjëruan mbi  kinematografinë, montazhin dhe strukturën narrative.

Norika Sefa ka theksuar rëndësinë e  programit për të ardhmen e kinematografisë në Kosovë.

“Këto ligjërata ofrojnë një bazë të shkëlqyer për regjisorët e rinj, duke i ndihmuar ata të  artikulojnë përvojat e tyre dhe duke i inkurajuar të paraqesin botën rreth tyre përmes  mediumit të filmit. Kjo është thelbësore për të ardhmen e kinematografisë sonë, pasi  platforma të tilla promovojnë diversitetin në rrëfim dhe përmbajtje më autentike”, është shprehur ajo.

Një veçori unike e Future is Here është theksi i saj mbi mentorimin nga pjesëmarrësit e dikurshëm. Flutura  Balaj, si pjesëmarrëse e vitit 2018, dhe Hana Ahmeti, si pjesëmarrëse e viteve 2020/2021, drejtojnë pjesëmarrësit e rinj kah procesi sfidues, por shpërblyes, ai i montazhit.

“Ky rrugëtim, nga studente në mentorë, ka qenë jetësore”, ka thënë Balaj. “Studentëve u  jepet liria të eksplorojnë dhe të zbulojnë zërin e tyre artistik, duke nxitur mendimin kritik  dhe lidhje të thella me temat që zgjedhin të rrëfejnë”.

Ndërkaq Hana Ahmeti është shprehur e kënaqur me “entuziazmin e të rinjve për të ndarë  perspektivat e tyre unike”. “Si mentore, gjej veten vazhdimisht të frymëzuar nga idetë e tyre”.

Çdo vit, Future is Here mirëpret pjesëmarrës që rikthehen për të ndërtuar mbi përvojën e tyre të  mëparshme, duke shtuar një shtresë unike të vazhdimësisë dhe rritjes në program. Ndër ta është edhe Suara Ismajli, e cila bashkë me Jonila Muriqin në vitin 2024 kanë qenë regjisore të filmit “Peroni 7”.

Duke reflektuar mbi vitin e saj të  dytë, Ismajli ka theksuar se kjo gjeneratë e ‘Future is  Here’ ka qenë e veçantë në mënyrën e saj.

“Vitin e kaluar ishte për të mësuar bazat, por  këtë vit u ndjeva më e sigurt dhe  më e përfshirë. Energjia krijuese  e kampit, nga gjenerimi i ideve  deri te shikimi i prerjeve të para,  ishte emocionuese dhe  kuptimplotë. Më bëri të kuptoj sa shumë kam  evoluar dhe sa e fuqishme është  të bashkëpunosh dhe të tregosh  histori që kanë rëndësi për ne”.

Për Ismajlin, kjo përvojë kapërceu kufijtë e realizimit të filmave, duke nxitur lidhje të thella  me bashkëmoshatarë me mendime të ngjashme dhe duke krijuar momente që ishin  njëkohësisht edukative dhe jashtëzakonisht frymëzuese.

Kampi i parë hodhi themelet për shtatë filma dokumentarë, të cilët do të përfundojnë në  shkurt 2025 gjatë një sesioni të dytë. Këto filma do të kenë premierën e tyre në edicionin e  24-të të DokuFest, në gusht të këtij viti, duke treguar përkushtimin dhe rritjen krijuese të studentëve.

Pjesëmarrës si Erenik Dreshaj e përshkruajnë procesin si transformues.

“Ligjëratat për dizajnin e zërit dhe punën me kamerën më hapën sytë ndaj artit të  realizimit të filmave. Edhe me udhëzime profesionale, kishim pavarësi të plotë në krijimin e  dokumentarëve tanë”, ka thënë ai.

Sipas njoftimit, përgjatë vitesh “Future is Here” ka trajnuar 111 studentë dhe ka prodhuar 80 filma, duke forcuar  reputacionin e tij si platforma kryesore në Kosovë për promovimin e regjisorëve të rinj dhe  në zhvillim, si dhe për nxitjen e një komuniteti krijues të gjallë. Programi është një shtyllë e  angazhimit të DokuFest për edukimin, zhvillimin kulturor dhe transformimin shoqëror. Duke  vazhduar të fuqizojë zërat e rinj, thekson rolin jetësor që ka rrëfimi i historive në ndërtimin e  urave sociale, nxitjen e dialogut dhe frymëzimin e shprehjes krijuese ndër breza.

Me çdo film, Future is Here rikonfirmon misionin e tij: t’u japë të rinjve të Kosovës mjetet,  besimin dhe platformën për të rrëfyer tregimet e tyre—dhe, duke bërë kështu, të formësojë  narrativën në evoluim të shtetit tonë të ri dhe dinamik.

Në moshën vetëm 15-vjeçare, Djellza Musliu, pjesëmarrësja më e re në programin e këtij viti  Future is Here, solli një perspektivë të freskët dhe frymëzuese në kamp.

“Gjatë këtij programi, mësuam  shumë gjëra të rëndësishme,  nga zotërimi i përdorimit të  kamerës dhe teknikat e dizajnit  të zërit, deri te kuptimi i  parimeve etike të realizimit të  filmave dokumentarë. Sesionet e trajnimit të  avancuar, të udhëhequra nga  profesionistë jashtëzakonisht të  aftë dhe me përvojë, ishin  njëkohësisht sfiduese dhe  shpërblyese”, ka deklaruar ajo.

Ajo që i bëri më shumë përshtypje Djellzës ishte qasja mbështetëse dhe e afërt e trajnerëve,  që e bëri edhe konceptet më komplekse të qasshme dhe tërheqëse.

“Të shikonim filma  dokumentarë na ndihmoi të gjenim frymëzim dhe të formësonim projektet tona. Por, ishte  pikërisht inkurajimi dhe ekspertiza e trajnerëve ajo që bëri ndryshimin e vërtetë”, ka thënë ajo.

Entuziazmi dhe rritja e Djellzës, sipas njoftimit, janë dëshmi e suksesit të programit për të kultivuar pasionin  për rrëfimin e historive tek pjesëmarrësit e rinj, pavarësisht moshës ose përvojës së tyre të  mëparshme.

Suksesi i qëndrueshëm i Future is Here thekson fuqinë transformuese të filmave  dokumentarë. Përderisa peizazhi kulturor i Kosovës evoluon, programe të tilla sigurojnë jo  vetëm një të ardhme të qëndrueshme, por edhe të mbushur me krijimtari dhe autenticitet. Për  regjisorët e rinj, udhëtimi fillon këtu—dhe për audiencën, rrëfimet që ata tregojnë do të  rezonojnë për vite me radhë.

Për 13 vite radhazi, Future is Here ka qenë programi kryesor i trajnimit në kuadër të  programit edukativ të DokuFest, duke kultivuar talentin e të rinjve të Kosovës dhe duke i  kthyer idetë e tyre krijuese në filma dokumentarë.

Të gjithë filmat e prodhuar nga Future is Here gjenden në Bibliotekën Digjitale për  Mësimdhënës të DokuFest, një platformë online e menaxhuar nga departamenti edukativ  DokuLab. Kjo platformë përfshin filma dhe materiale didaktike të dizajnuara për të  mbështetur përdorimin e filmit në klasë, në përputhje me Kornizën Kurrikulare të Republikës  së Kosovës. Aktualisht, ajo është duke u përdorur nga 400 mësimndhënës nga e gjithë  Kosova. Future is Here është pjesë e projektit Shkollat dhe Dokumentarët, i mbështetur nga  National Endoëment for Democracy. /Telegrafi/