Futboll, derbi përfundoi pa fitues

Kryendeshja e xhiros së 21-të e Raiffeisen Superligës në futboll që u zhvillua të dielën ndërmjet Besës dhe Hysit, përfundoi pa gola.

Takimi, i cili u zhvillua në kushte të vështira atmosferike, solli raste të mira shënimi, lojë të bukur dhe angazhim maksimal të futbollistëve në fushë.

Besa prej minutës së 49 mbeti me një futbollist më pak në terren, pasi qw mbrojtësi Gacaferi u ndëshkua me kartonin e dytë verdhë.

Takimi ishte i fortë dhe me rivalitet ndonëse kësaj përballje i munguan vetëm golat.

Gjilani pësoi edhe një humbje, këtë herë në fushën e vetë në duel me Vëllaznimin (2-4), për ta humbur edhe një betejë të mbijetesës në elitë. Vëllaznimi me këto tre pikë tashmë është pozicionuar në vendin e dytë me vetëm një pikë më pak se lideri Prishtina.

Pikët e shpresës i inkasoi edhe Trepça e cila mposhti Lepencin (2-0). Xehetarët shënuan një fitore të rëndësishme për t’i ikur zonës së rrezikshme .

Pas kësaj xhiroje, kryeson Prishtina me 38 pikë, para Vëllaznimit me 37, dhe Trepçës ’89 dhe Dritës me nga 35 pikë. Në tri pozitat e fundit klasifikohen Gjilani me 19 pikë, KEK-u me 20 pikë dhe Lepenci me 25 pikë. /Telegrafi/