Franca sfidon BE-në me buxhet

Franca ka “injoruar” thirrjet e partnerëve të Bashkimit Europian, duke prezantuar një buxhet për vitin 2015 pa kursime, pavarësisht se ekonomia e dytë më e madhe në Eurozonë ka shtyrë me dy vjet kohën e plotësimit të kushteve të Komisionit Europian.

“Ne kemi marrë vendimin për të përshtatur ritmin e reduktimit të deficitit me situatën ekonomike të vendit”, deklaroi ministri francez i Financave, Michel Sapin.

“Politika jonë ekonomike nuk po ndryshon, por deficiti do të reduktohet me një hap më të ngadaltë se sa ishte planifikuar për shkak të rrethanave ekonomike – rritje shumë e dobët dhe inflacion shumë i ulët”, shtoi Sapin.

Sipas planit buxhetor, deficiti publik parashikohet të bjerë nga 4.4 për qind të Prodhimit të Brendshëm Bruto që është këtë viti, në 4.3 për qind në 2015, 3.8 për qind në 2016 dhe 2.8 për qind në 2017, poshtë kufirit prej 3 për qind të vendosur nga Bashkimi Europian. Më herët, Franca kishte premtuar se do ta ulte deficitin poshtë 3 për qind në vitin 2015, por ky objektiv u bë i pamundur. /Telegrafi/