FMN tregon se kur mund të rriten pagat në sektorin publik

Qeveria e Kosovës ka pranuar kërkesën e Fondit Monetar Ndërkombëtarë (FMN), që gjatë këtij viti mos të ketë rritje të pagave për sektorin publik.

Burime të ORAinfo, bëjnë të ditur se stafi i FMN-së gjatë vizitës në Kosovë, i kanë kërkuar ministrit të Financave, Avdullah Hoti që të ruaj stabilitetin financiar dhe në këtë mënyrë të mos ketë rritje të pagave sivjet për sektorin publik.

FMN po ashtu ka kërkuar nga autoritetet e Kosovës që të sigurojnë që pagat në sektorin privat të jenë të përafruara me atë publik.

“Delegacioni nga FMN ka kërkuar që rritja e pagave të bëhet komfor rritjes makroekonomike, gjë që nuk do të krijonte pasoja në buxhet. Kërkesa e tyre ka qenë një lloji kushti për të hyrë në marrëveshje me Kosovën, nga e cila vendi ynë përfiton 185 milionë euro kredi”, kanë thënë burime brenda takimeve më FMN-në .

Në anën tjetër, sindikalistët thonë se nuk do të pranojnë që sivjet mos të ketë rritje të pagave.

Kryetari i SBASHK-ut, Rrahaman Jasharaj ka thënë për ORAinfo, se nuk do të heqin dorë nga rritja e pagave. “Ne jemi të vetëdijshëm për mundësitë buxhetore. Ne nuk po kërkojmë rritje të madhe të pagave, mirëpo qëndrojmë pran kërkesave që të ketë një rritje të vogël të pagave”, ka thënë Jasharaj.

Ai ka thënë se gjate takimeve që kanë pasur me zyrtarët e FMN-së, nuk është shtruar asnjëherë kërkesa nga ta për mos rritje të pagave. “Zyrtarët e FMN-së në takimet që i kemi pasur na kanë thënë se nuk përzihen për ndarjet buxhetore, por njëkohësisht na kanë sugjeruar se duhet pasur kujdes në stabilitetin financiar”, ka thënë Jashari.

Ndryshe, pas 10 ditë diskutimesh, Qeveria e Kosovës dhe FMN-ja kanë arritur marrëveshje për një program 22 mujor, i cili akomodon në tërësi nevojat që ka shteti i Kosovës. Kredia që ka përfituar Kosova do të investohet në sektorë të ndryshëm, duke përfshirë edhe atë të bujqësisë, arsimit, shëndetësisë etj. /Telegrafi/