Fitore e madhe e Prishtinës

Sigal Prishtina ka arritur të shënojë një fitore tejet të rëndësishme në derbin e javës së 23-të të BKT Superligës së Kosovës në basketboll, kundër Pejës me vetëm dy pikë epërsi, 64-62.

Palestra e Pallatit të Rinisë dhe Sporteve në kryeqytet ishte mbushur përplot me Plisat, të cilët kishin përgatitur një koreografi të shkëlqyer për ekipin e tyre të zemrës.

Ndeshja që në fillim u përcoll me një ritëm të lartë të të dy palëve dhe me një vëmendje më të theksuar në mbrojtje. Sidoqoftë, Prishtina ishte më efikase në sulm, kështu që e fitoi çerekun e parë, 18-13.

Në çerekun e dytë pejanët u këndellën pak dhe filluan të luanin më mirë, por në tre minutat e fundit basketbollistët e Prishtinës eksploduan me trepikëshat e tyre për të krijuar një epërsi solide prej 12 pikëve, 41-29.

Në çerekun e tretë vendasit në fillim e çuan epërsinë e tyre deri në 15 pikë, por pastaj filluan të luanin pa ide në sulm, duke bërë kështu gabime të njëpasnjëshme. Pejanët e shfrytëzuan këtë krizë të bardhekaltërve për të zvogëluar epërsinë në vetëm gjashtë pikë, 52-46.

Në çerekun e katërt u zhvillua një lojë dhe dramë e vërtetë. Pejanët vazhdimisht e ngushtonin epërsinë, por bardhekaltërit ia dolën mbanë ta ruajnë rezultatin dhe ta fitojnë këtë derbi shumë të rëndësishëm, 64-62.

Për Sigal Prishtinën më i miri në fushë ishte Julian Terrell me 18 pikë, ndërsa për Pejën më së shumti pikë shënoi Alban Veseli (21).

Rezultatet e javës së 23-të në basketboll:

Vëllaznimi : RTV 21 80-105
Sigal Prishtina : Peja 64- 62
Trepça : Kosova 101-63
Sigkos Bashkimi : Drita 94-80

Tabela

1. Peja 43 pikë
2. Sigal Prishtina 41
3. Sigkos Bashkimi 39
4. Trepça 37
5. RTV 21 35
6. Vëllaznimi 28
7. Drita 27
8. Kosova 24

/Telegrafi/