Filmat me më shumë nominime për Oskar

Gjatë 87 viteve të mbajtjes së ceremonisë së ndarjeve të çmimeve Oskar, historia ka rezervuar filma shumë të mirë e kryevepra, disa prej të cilëve janë vlerësuar mjaftueshëm e disa të tjerë jo aq sa duhet.

Koha.net sjell 10 filmat që kanë marrë më shumë nominime për Oskar:

10. The Lord of the Rings: The Fellowship of the Ring (2001) – Film nga Peter Jackson dhe pjesa e dytë e trilogjisë së famshme “Lord of the Rings” ka arritur të mbledhë plot 13 nominime megjithëse ka fituar katër prej tyre dhe nuk është shpallur filmi më i mirë i vitit.

9. Who’s afraid of Virginia Woolf? (1966) – Filmi është nominuar 13 herë dhe ka fituar në pesë kategori, duke përfshirë edhe atë të aktores më të mirë për Elizabeth Taylor.

8. Mary Poppins (1964) – Mega hiti nga Disney për një dado që këndon edhe vallëzon ka arritur të mbledhë 13 nominime gjithashtu dhe ka fituar pesë prej tyre, por jo edhe Oskar për filmin më të mirë të vitit.

7. CHICAGO (2002) – Adaptimi për ekran të madh nga shfaqja muzikale e Broadway është nominuar 13 herë dhe ka fituar gjashtë çmime, madje edhe atë për filmin më të mirë të vitit.

6. Forrest Gump (1994) – Viti 1994 ka qenë vit i madh për filma, por filmi nga Robert Zemeckis ka triumfuar si me nominime ashtu edhe me çmime të marra. Me 13 nominime dhe shtatë shpërblime, Tom Hanks ka mundur aktorë që kanë shkëlqyer në rolet e tyre atë vit për çmimin në rol kryesor ndërsa vetë filmi ka mundur filma të mëdhenj, si “Pulp Fiction” e “The Shawshank Redemption’ për filmin e vitit.

5. Shakespeare in Love (1998) – Edhe ky film ka marrë 13 nominime dhe ka arritur të fitojë më shumë se gjysmën prej tyre, shtatë. Ka fituar për aktoren më të mirë në rol kryesor e dytësor e madje edhe për filmin më të mirë.

4. From Here To Eternity (1953) – Filmi ka marrë 13 nominime dhe 8 herë është shpërblyer, duke përfshirë edhe çmimin kryesor. Gjithashtu, Frank Sinatra ka fituar Oscarin e vetëm në karrierën e tij për aktorin më të mirë në rol dytësor.

3. Gone With the Wind (1939) – Filmi shumë i suksesshëm ka arritur të mbledhë 13 nominime dhe të marrë tetë çmime dhe atë të gjitha çmimet kryesore të mbrëmjes.

2. All About Eve (1950) – Njëri nga dy filmat e të gjitha kohërave që ka arritur të marrë 14 nominime. Filmi ka fituar gjashtë statuja, duke përfshirë atë për filmin më të mirë dhe regjisorin më të mirë.

1. TITANIC (1997) – Ndër filmat më të suksesshëm të të gjitha kohërave në të gjitha aspektet, duke arritur të marrë 14 nominime dhe të shpërblehet me 11 çmime Oskar, përfshirë edhe atë për filmin më të mirë të vitit dhe James Cameron që është shpallur si regjisori më i mirë. “Titanic” po ashtu ka qëndruar për një kohë të gjatë në vendin e parë si filmi që ka mbledhur më shumë të holla.