Epoka e celularëve ka filluar para 38 vitesh

Telefonat mobil gjatë pesëmbëdhjetë viteve të fundit kanë sjellë ndryshime të rëndësishme në jetët tona. Për disa ndoshta është befasues fakti se thirrja e parë me anë të celularit është bërë para saktësisht 38 vitesh. Kjo ka ndodhur në vitin 1973.

Britaniku Martin Cooper, i cili konsiderohet edhe si shpikës i celularit, prototipin e kësaj pajisje për herë të parë e ka përdorë duke u sjellë rrugëve të New Yorkut më 3 prill 1973. Në atë kohë kalimtarët e rastit ishin tërësisht të habitur.

“Derisa po ecja dhe po flisja në telefon, njujorkezët ishin të habitur dhe çuditur, sepse nuk besonin se një gjë e tillë ishte e mundur. Në atë kohë nuk kishte telefona pa tela. I kisha bërë disa thirrje, përfshirë edhe atë me një spiker të radios së New Yorkut”, ka thënë tani 82-vjeçari Cooper.

Në atë kohë ishte menaxher i përgjithshëm i njësisë së Motorolas për sistemet e komunikimit.

Pas bisedës me spikerin, Cooper kishte thirrur edhe rivalin e tij, Joel S. Engel, i cili ishte shef i kompanisë telefonike Bell Labs. Ai kishte ftuar edhe kolegët e tij për t’ua dhënë lajmin e mirë se Motorola kishte mundur kompaninë Bell dhe kishte zhvilluar telefonin e parë celular.

Pas kësaj, celularin ua kishte dhënë gazetarëve për të vërtetuar nëse shpikja e tij me të vërtetë funksiononte. Cooper e kishte pasur vizionin për të bërë telefonat gjëra bartëse për kohë të gjatë, raporton gazeta britanike Daily Mail.

Të pasurit kishin mundësi të kanë telefona celularë në automjetet e tyre, por në bagazh duhej të bartnin bukur do pajisje përcjellëse të nevojshme për funksionimin e tyre.

Telefoni i parë celularë i Cooper peshonte 1.1 kilogramë. U nevojitën dhjetë vjet që Motorola të paraqesë Dyna-TAC, telefonin e parë komercial, i cili filloi të shfrytëzohet më 1983. Ai peshonte 453 gramë, dhe kushtonte sa 3.500 euro të sotme. /Telegrafi/