A e dini pse kripa përshpejton korrozionin e veturës suaj?!

Hedhja e kripës në rrugë është mënyra se si përballemi me kënaqësitë dimërore në rrugë, si bora dhe akulli, që për fëmijët janë sinonim i argëtimit, ndërsa për ne të rriturit shpesh janë burim nervozizmi dhe rrëshqitjesh.

Pa kripë, konsumimi i qetësuesve ndër shoferët do të ishte dukshëm më i lartë, por nuk mund ta konsiderojmë kripën vetëm si “heroinë” të kësaj drame dimërore. Ajo është një aktore komplekse në këtë film dimëror, me role që ndikojnë si pozitivisht, ashtu edhe negativisht.

Çeliku, materiali kryesor për pjesët e makinave si karroceria, amortizatorët dhe frenat, është një aliazh i hekurit me karbon dhe elementë të tjerë.

Hekuri, kur bie në kontakt me ujin dhe oksigjenin, nis një reaksion kimik që krijon oksidin e hekurit, i njohur ndryshe si ndryshku.

Këtu hyn në lojë kripa, që shkrin akullin, por njëkohësisht përshpejton edhe procesin e korrozionit. Kripa tërheq ujin dhe lehtëson lëvizjen e elektroneve, duke rritur shpejtësinë e reaksionit të oksidimit, që është shkaku kryesor i ndryshkut.

Ndryshe nga kripa e kuzhinës, kripa që përdoret për rrugët është e papërpunuar dhe ka aftësi të larta për të thithur dhe tharë lëngjet. Kjo e bën atë shumë efektive për pastrimin e rrugëve nga bora dhe akulli, por bashkëveprimi i saj me lagështirën mund të shkaktojë korrozion në pjesët metalike të makinave, veçanërisht tek rrotat, nënshasia dhe ngjyra.

Sa i përket gomave, kripa nuk ka ndonjë ndikim negativ, falë përbërjeve speciale nga të cilat ato janë prodhuar. Materialet e gomave janë të qëndrueshme ndaj lagështirës dhe për këtë arsye nuk reagojnë ndaj kontaktit me kripën në të njëjtën mënyrë si metali. /Telegrafi/