Donald Trump i përgjigjet Angela Merkelit me një paralajmërim ogurzi për Gjermaninë

Donald Trump ka hedhur poshtë komentet e fundit të Angela Merkel për mosbesueshmërinë e SHBA-VE si një partner tregtar.

Përmes një postimi në Twitter, presidenti amerikan ka thënë se Amerika kishte një “deficit tregtar masiv me Gjermaninë” dhe paralajmëroi: “Kjo do të ndryshojë”.

Një deklaratë e tillë, sipas medieve të huaja, përcjell Telegrafi, vjen pasi Merkel tha se Gjermania nuk mund të mbështetet më në SHBA nën presidencën e zotit Trump.

“Ne kemi një deficit tregtar masiv me Gjermaninë, plus ata paguajnë më pak se sa duhet në NATO dhe ushtri. Shumë keq për SHBA-të. Kjo do të ndryshojë”, ka shkruar Trump.

We have a MASSIVE trade deficit with Germany, plus they pay FAR LESS than they should on NATO & military. Very bad for U.S. This will change

— Donald J. Trump (@realDonaldTrump) May 30, 2017

Duke folur në një ngjarje të zhvilluar në një tendë të birrës bavareze, Kancelarja gjermane theksoi nevojën për marrëdhënie miqësore me SHBA, Britani dhe Rusi, por shtoi: “Ne evropianët duhet ta marrim me të vërtetë fatin tonë në duart tona”.

Merkel tha se, ndërsa aleanca tradicionale perëndimore kërcënohet nga presidenca e re e SHBA-ve dhe Brexit, “kohërat në të cilat mund të llogarisim plotësisht tek të tjerët janë paksa të mbaruara”.

Komentet e saj erdhën pasi Trump tha se kishte nevojë për më shumë kohë për të vendosur nëse SHBA-të do të vazhdojnë mbështetjen e marrëveshjes së klimës së Parisit, e cila i ka irrituar diplomatët evropianë. /Telegrafi/