Dogana rrit të hyrat, por nuk ka program për luftimin e kontrabandës

Doganat e Kosovës për dy muajt e parë të këtij viti ka realizuar mbi 99 milionë euro të hyra apo 18 milionë euro më shumë se në periudhën e njëjtë të vitit paraprak – kur ishin 81 milionë euro.

Drejtori i Doganave të Kosovës, Lulzim Rafuna tha për KosovaPress se rritja e të hyrave vjen si rezultat i rritjes së akcizës në duhan, rritjes së TVSH-së dhe luftimit të kontrabandës dhe evazionit fiskal.

Rafuna tha se nuk ka të dhëna se sa është vlera e kontrabandës për një vit, pasi sipas tij kjo është e pamundur të dihet.

Nga ana tjetër, ish ministri i Financave, Haki Shatri ka thënë se Qeveria nuk po e lufton evazionin fiskal ngase deri më tani nuk ka pasur ndonjë program për luftimin e evazionit fiskal.

Lulzim Rafuna, drejtor i Doganave, ka treguar disa prej indikatorëve që dëshmojnë në rënien e kontrabandës.

Si fakt, sipas tij, në veri ka shtrenjtim të mallrave të konsumit.

“Është ngritja e çmimeve e atyre mallrave të konsumit në veri. Indikacioni i dytë është fillimi i shitjes së mallrave nga pjesa jugore në pjesën veriore, që nuk ka ndodhur asnjëherë deri në vitin e kaluar”, ka thënë Rafuna.

Ai po ashtu ka treguar edhe indikatorët të tjerë që kanë ndikuar në rritjen e të hyrave, që sipas tij janë akciza në duhan dhe rritja e TVSH-së.

Ai po ashtu tha se nuk mund të dijë se sa është vlera e kontrabandës pasi sipas tij është e pa mundur të dihet shifra e saktë.

Anëtarja e Komisionit për Buxhet dhe Financa, Besa Gaxheri mendon se me ndryshimet e pakos fiskale dhe me ngritjen e doganave në veri kontrabanda ka rënë pak.

Por ajo mendon se ka hapësirë të mjaftueshme të luftohet kjo dukuri.

Po ashtu Gaxheri tha se duhet të luftohet evazioni fiskal edhe përbrenda e jo vetëm në kufij.

E kjo sipas saj mund të behët përmes mekanizmave ligjorë. /Telegrafi/