Demokracia alla-rusçe II

Në fund të Shtatorit që kaloi, në një artikull me të njëjtin titull, shkrova mbi shkëmbimin e posteve më të larta të shtetit dhe qeverisë ruse – atë të kryeministrit dhe presidentit – midis zotërinjve Vladimir Putin dhe Dmitri Medvedev, sikur këto poste të larta të ishin molla, ti merr këtë, unë po marr atë. Ky vendim, sipas ekspertëve të çështjeve ruse, mund të ketë qenë një gabim, reagimet negative ndaj të cilit ai ndoshta nuk i ka parashikuar. Që prej pothuaj dy-tre muaj më parë, shihej se diçka nuk ishte në rregull në politikën ruse, sepse qysh atëherë i “vinte era” kësaj që po shohim sot nëpër rrugët e Moskës dhe të qyteteve të tjera anë e mbanë Rusisë, si reagim ndaj manipulimeve dhe planeve afatgjata të Zotit Putin për të qëndruar në fuqi. Në protestat, që sipas korrespondentëve të huaj në Moskë, janë më të mëdhatë në atë vend që prej rënies së Bashkimit Sovjetik, me dhjetëra mijëra rusë janë duke protestuar për ato që ata i konsiderojnë si vjedhje to votave dhe manipulime të zgjedhjeve parlamentare të fundit nga ana e Vladimir Putinit dhe partia e tij Rusia e Bashkuar. Si shembull manipulimesh e vjedhjesh, mediat e ndryshme përmendin rastin e Çeçenisë, e cila qe shkatërruar nga lufta e Putinit disa vjet më pare, por ku sipas autoriteteve, në zgjedhjet e fundit morën pjesë 99 për qind e votuesve dhe 99.5 e tyre votuan për partinë e Zotit Putin, Rusia e Bashkuar.

Manipulimet u vërtetuan jo vetëm nga udhëheqësit e opozitës ruse, por edhe nga vëzhguesit ndërkombëtarë. Të hënën që kaloi, vëzhguesit e zgjedhjeve nga Organizata për Sigurim dhe Bashkëpunim në Evropë (OSBE) njoftuan për shumë shkelje të rregullave të zgjedhjeve në favor të Partisë Rusia e Bashkuar që qeverisë vendin. Administrata amerikane e Presidentit Obama si edhe organizata të shumta qeveritare dhe jo-qeveritare kanë shprehur “shqetësime serioze” mbi procedurat e zgjedhjeve në Rusi, ndërsa nga pikëpamja zyrtare e Kremlinit, Presidenti rus Medvedev u shpreh për mediat se zgjedhjet ishin “të ndershme dhe demokratike”. Megjithëkëtë, Zoti Medvedev tha javën e kaluar se akuzat për manipulime që çuan në protesta anë e mbanë Rusisë duhet të hetohen, ndërsa Kryeministri Putin akuzoi Shtetet e Bashkuara se nxitën grupet e opozitës pas zgjedhjeve. Ndërsa ish-udhëheqësi sovjetik Mihail Gorbaçov bëri thirrje për zgjedhje të reja.

Është e kollajtë për Zotin Putin që të akuzojë Shtetet e Bashkuara dhe të tjerë për nxitjen e protestave, por e vërteta është se pakënaqësitë në shoqërinë ruse, që ishin gjatë gjithë kohës në sipërfaqe, janë shtuar dukshëm që prej kohës që Zoti Vladimir Putin njoftoi se do të kthehej në detyrën e presidentit të Rusisë. Kjo për më tepër sepse në qoftë se ai merr atë detyrë rishtas Marsin që vjen, për të cilën gjë ekspertët thonë se ka shumë pak dyshim, atëherë ai do të shërbejë edhe për dy afate prej gjashtë vitesh në detyrën e presidentit, d.m.th., deri në vitin 2024. Prandaj, përveç vjedhjes dhe manipulimit të zgjedhjeve të javës së kaluar, është regjimi i tij autoritar, mundësia dhe perspektiva e zgjatjes ose përjetësimit të këtij regjimi autoritar deri më 20024, ajo që ndër të tjera, shkakton pakënaqësitë dhe protestat në Moskë dhe në qytete të tjera anë e mbanë vendit.

Nuk është e qartë se çdo të bëjë Zoti Putin dhe togeri i tij Medvedev me situatën e krijuar prej tyre. Ata mund ta përmirësojnë ose mund ta bëjnë më keq, por ama nuk mund ta injorojnë, pasi zërat për më shumë demokraci në Rusi po shtohen, ndërkohë që qëndrimi ndaj tyre, nga ana e autoriteteve ruse, duket se po bëhet gjithnjë e më pak tolerant, siç u pa gjatë javës së kaluar, kur sipas lajmeve, mbi 50-mijë policë ishin venë në gjendje gatishmërie në Moskë për tu përballuar me protestuesit. Shtypjet brenda vendit si dhe deklaratat retorike anti-perëndimore siç bëri Zoti Putin javën që kaloi duke kërcënuar se Rusia mund të drejtojë raketat kundër instalimeve anti-raketore amerikane në Evropë, të sjellin ndërmend periudhën sovjetike të luftës së ftohtë, një periudhë kjo që nuk i solli dobi as gjendjes së brendshme as marrëdhënieve ndërkombëtare.

Tani për tani, regjimi i Zotit Putin nuk duket të jetë në rrezik, por protestat ruse kundër manipulimeve të zgjedhjeve dhe vjedhjes së votave, që organizuesit thonë se do të vazhdojnë në ditët e ardhshme, janë një vazhdim i protestave që ndodhën gjatë këtij viti – e të cilat shprehën pakënaqësitë me udhëheqësit autoritarë anë e mbanë botës. Megjithëse kushtetuta ruse mund t’i japë të drejtë Zotit Putin të qeverisë edhe për 12 vjet të tjera, siç duket Rusia po ndryshon, dhe shpresojmë se protestat kundër manipulimit të zgjedhjeve të së Dielës që kaloi, të shënojnë fillimin dhe jo mbarimin e një ringjalljeve demokratike.