BQK ua merr licencat mikrofinancave të dyshuara për financim të terrorizmit

Një numër ndërmarrjesh që operojnë në Kosovë kanë vendosur që fitimet e tyre të mos i investojnë, por t’i depozitojnë. Sipas të dhënave të fundit që i ka Banka Qendrore e Kosovës nga depozitat që tejkalojnë në 74 për qind, 8 për qind janë depozita të ndërmarrjeve, një proces që viteve të fundit ka nisur të rritet.
Në një intervistë për KTV-në, guvernatori i BQK-së, Bedri Hamza, këtë lëvizje e ka lidhur me mungesën e planeve të bizneseve për investime. Ai ka thënë se sektori bankar po vazhdon të ketë rritje të aseteve dhe kredive, ndërkaq një pjese e tyre kanë nisur t’i ulin normat e kredive, për të cilat thotë se deri në fund të këtij viti do të jenë njëshifrore.

Hamza ka bërë të ditur se për shkak të dyshimeve për financim të terrorizmit u është marrë licenca disa institucioneve mikrofinanciare.

Kreu i BQK-së ka bërë të ditur se nëpër gjykata gjenden më shumë se 10 mijë lëndë të dërguara nga bankat dhe për këtë ka qenë plani që të bëhen disa reforma, por se ato janë bllokuar për shkak të ngërçit politik, siç janë bllokuar edhe plotësim ndryshimet e ligjit për sigurimet dhe për institucionet mikrofinanciare. Këtë vit sipas parashikimeve të BQK-së, Kosova do të ketë rritje ekonomike që sillet rreth 3 për qind, ndërsa investimet ndryshe nga viti i kaluar që kishin rritje, në gjashtëmujorin e këtij vitit kanë pësuar rënie.

Sa u përket remitencave, ato vazhdojnë të jenë stabile, mirëpo drejtues të BQK-së kanë kërkuar nga institucionet që të bëjnë reforma, në mënyrë që ato para të kanalizohen në investime, e jo në konsum, pasi që një nivel i tillë prej më shumë se 600 milionë eurosh mund të pësojë ulje. /Telegrafi/