Boris Johnson: Rusia mund të ketë kryer krime lufte në Siri

Sipas sekretarit të Jashtëm britanik, Boris Johnson, Rusia mund të ketë kryer krim lufte, nëse qëndron ajo pas sulmit ndaj autokolonës me ndihma të OKB-së në Siri.

Johnson i tha BBC-së se duhet pyetur nëse forcat ruse i kanë shënjestruar civilët qëllimisht, kur 18 kamionë dhe një depo u shkatërruan nga sulmi i së hënës, gjatë të cilit humbën jetën 20 vetë.

Rusia mohoi çdo përgjegjësi, duke ua faturuar sulmin rebelëve apo edhe ndonjë dronei amerikan. Shtetet e Bashkuara reaguan pas ngjarjes, duke thënë se në goditjen e autokolonës ishin përfshirë dy aeroplanë rusë.

Kryediplomati britanik shkon edhe më tej me pretendimet se karvani i ndihmave mund të jetë shënjestruar qëllimisht.

“Vladimir Putin, jo vetëm ia dorëzon revolverin Bashar al-Assadit, por në disa raste e shkrep këmbëzën vet. Duhet të verifikojmë nëse ka pasur apo jo goditje të qëllimtë, edhe pse dihej fare mirë se cilët ishin civilët e pafajshëm në shënjestër. Ky është krim lufte”, tha Johnson.

Sulmi detyroi Kombet e Bashkuara të pezullonin shpërndarjen e ndihmave në Siri. Bombardimi i zonave të kontrolluara nga rebelët në Aleppo ka vazhduar përgjatë të gjithë javës, pas përfundimit të armëpushimit, duke e detyruar Sekretarin e Përgjithshëm të OKB-së Ban Ki-moon të shprehet i tmerruar nga “përshkallëzimi i skajshëm” i situatës në këtë qytet.