Beqaj: Kryetarët që s’e shpenzojnë buxhetin mirë duhet të shkojnë…!

Kryetarët që nuk dinë t’i shpenzojnë paratë publike në mënyrë të duhur duhet të shkojnë në shtëpi, madje nëse ka shkelje të procedurave duhet të shkojnë edhe diku tjetër. Kështu ka thënë Ministri i Financave, Besim Beqaj, sipas të cilit është krijuar praktikë e keqe bartja e mjeteve dhe kjo tregon për mosmenaxhim të mirë të parasë publike.

Nën organizimin e Ministrisë së Financave, Ministrisë së Administrimit të Pushtetit Lokal, Asociacionit të Komunave të Kosovës, si dhe Zyrës së Auditorit të Përgjithshëm u mbajt konferenca “Performanca financiare dhe ofrimi i shërbimeve në komuna në vitin 2013”, ku pjesëmarrësit thanë se duhet të punohet në menaxhimin sa më të mirë të parasë publike.

Ministri i Financave Besim Beqaj, tha se është praktikë shumë e keqe dhe tregues për mosmenaxhim të mirë të parasë publike, bartja e mjeteve nga viti në vit. Madje, ai tha se ata kryetarë që nuk dinë ta shpenzojnë buxhetin, duhet të shkojnë në shtëpi, bile nëse ka shkelje të procedurave, edhe vende tjera, e jo të stimulohen nga Qeveria apo Ministria pse e ka përdorë mirë paranë publike, sepse e ka detyrë dhe përgjegjësi para qytetarëve ta përdorë mirë paranë publike.

“Të gjithë zyrtarët që nuk bëjnë menaxhim të mirë të parasë publike duhet të shkojnë në shtëpi, ose nëse ka shkelje duhet të procedohet diku tjetër, por jo ata të cilët bëjnë mirë t’i japin edhe stimulime. Duhet të parandalohemi nga dëshirat, bartja e të hyrave nga viti në vit është praktikë e keqe, sepse nuk është menaxhim i mirë i parasë publike. Ato mund të bartën prej një viti në vitin tjetër, por jo të bartën tre, katër vite të shfrytëzohen vetëm atëherë kur i duhen dikujt për t’i shfrytëzuar, kjo është logjika e bartjes së parave publike nga viti në vit”, tha Beqaj.

Ky reagim i Ministrit Beqaj, erdhi nga kërkesa e Sazan Ibrahimit nga Asociacioni i Komunave të Kosovës, që për menaxhim të mirë të parasë publike, komunat duhet të stimulohen. “Do të ishte shumë mirë që kur të bëhen këto iniciativa të përcillen edhe me grante stimuluese. Nëse komunat dallohen me punën dhe performancën e saj atë herë të ketë një grant stimulues i cili nuk do të shfrytëzohet në atë kuptimin për implementimin e projekteve madhore komunale”, theksoi Ibrahimi.

Ndërsa, Artan Venhari, zëvendësauditor i përgjithshëm tha se synimi i tyre ka të bëjë me transparencën ndaj qytetarit se sa janë ata duke përfituar nga fondet përmes tatimeve që si taksapagues i japin. /Telegrafi/