Bankat komerciale “vjelin” qytetarët përfitues të kuponave fiskal

Konsumatorët të cilët grumbullojnë kupona fiskal dhe po i dërgojnë në Administratën Tatimore të Kosovës (ATK) për të fituar para gjatë aplikimit për rimburism të vlerës së tatueshme, janë të obliguar që gjatë procesit të aplikimit të vendosin në pliko të dhënë të sakta, si: numrin personal, numrin e llogarisë bankare dhe emrin e bankës. Megjithatë, bankat komerciale në vend po aplikojnë tarifa të larta duke iu ndalur konsumatorëve deri në 25 për qind të shumës së fituar prej kuponëve me çminimin e transaksionit bankar.

Këtë veprim të cilin janë duke e bërë bankat nuk kanë të drejtë, pasi që transaksioni bëhet fjalë për brenda Kosovës jo jashtë vendit.

Drejtues të Administratës Tatimore të Kosovës thonë se për sa i përket shpenzimeve, kjo është përgjegjësi e bankave, ndërsa zyrtarë të Shoqatës së Bankave premtojnë se kjo çështje do të rregullohet në javët në vijim, duke aplikuar sisteme elektronike dhe se nuk do t’iu ndalen më përqindjet e kuponëve fiskal nga bankat atyre të cilëve po i kontribuojnë uljes së ekonomisë informale.

Ushtruesi i Detyrës së drejtorit të Administratës Tatimore të Kosovës(ATK), Nahit Sharku, deklaron për KosovaPress se bankat komerciale duhet ta kenë në konsideratë çështjen e rimbursimit të kuponëve fiskal, sepse bëhet fjalë për konsumatorë.

Sipas drejtuesit të ATK-së, çështja e Administratës Tatimore është që të shqyrtojë kërkesat dhe t’i kthejë parat në llogaritë që aplikuesit i dorëzojnë në ATK. Kurse, ATK nuk mund të kthej para kesh, por do të kërkohet patjetër një xhirollogari e aplikuesit.

Drejtori ekzekutiv i Shoqatës së Bankave të Kosovës, Petrit Balija, për KosovaPress thotë se janë duke bashkëpunuar me ATK dhe Bankën Qendrore të Kosovës (BQK) që tarifat mos të aplikohen në këtë formë, por të procedohen përmes modulit masiv që mos të ketë tarifa në marrjen e rimbursimit të kuponëve fiskal.

Sipas kreut të shoqatës së bankave, tarifat janë aplikuar si transaksione të rregullta, ku në fakt ishte dashur të aplikohet një kod special i cili liron qytetarët nga tarifat.

Kreu i shoqatës së bankave beson se të gjithë duhet të mobilizohen që kuponët fiskal të mblidhen sa më shumë nga qytetarët dhe të dorëzohen e të kenë shpërblimin e tyre pa u tatimuar ose pa pasur tarifa të caktuara sepse, siç tha ai, në mbledhja e kuponëve fiskal është edhe në dobinë e ekonomisë së Kosovës.

Deri më tash, sipas informatave të ATK-së, janë rreth 25 mijë aplikantë që kanë dorëzuar kuponë fiskal në ATK për rimbursim. Këto të dhëna ndryshojnë nga dita në ditë.