Banimi Social, me kosto prej 9.5 milionë euro

Ministri i Mjedisit dhe Planifikimit Hapësinor, Ferid Agani, ka marrë pjesë sot në tryezën rrumbullakët të dedikuar për “Konceptin e Programit të Banimit Social në Kosovë”, në të cilën morën pjesë përfaqësues të ministrive partnere dhe donatorë të interesuar për implementimin e këtij programi.

Ministri Agani, falënderoi të gjithë partnerët vendorë, si dhe partnerët dhe miqtë e Kosovës që janë bashkuar me Qeverinë, në kërkim të zgjidhjes së qëndrueshme të banimit për të gjitha kategoritë e cenueshme nëpër Kosovë.

“Kjo tryezë, dëshmon angazhimin e fuqishëm të nivelit qendror për koordinim të mëtejshëm, programim të përbashkët dhe bashkimin e resurseve ndërmjet ministrive relevante dhe gjithashtu me subjektet partnere në fushat relevante për nxitjen e zhvillimit të qëndrueshëm në Kosovë, përmirësimin e ofrimit të banimit dhe fuqizimin e institucioneve që t’iu shërbejnë më mirë qytetarëve dhe për përmirësimin e integrimit socio-ekonomik”, theksoi Agani.

Ai deklaroi se integrimi i grupeve më të varfra dhe më të cenueshme është njëra nga çështjet më sfiduese në të gjitha rajonet, duke përfshirë ekonomitë e zhvilluara dhe ekonomitë në zhvillim. Një përqindje e konsiderueshme e familjeve në Kosovë nuk kanë qasje në banimin e përballueshëm dhe kjo veçanërisht godet të rinjtë dhe popullatën e lëvizshme, si dhe të varfrit dhe të riatdhesuarit.

Programi 3 vjeçar i Banimit Social, kërkon një buxhet të përgjithshëm prej 9.5 milionë euro. Zotimet e bëra nga Qeveria arrijnë shumën në 4.9 milionë euro. Andaj, në këtë tryezë u konkludua, se për të bërë të mundur implementimin e këtij programi duhet ndihma e donatorëve, për të siguruar edhe 4.6 milionë euro.

Kjo tryezë e rrumbullakët, është organizuar nga MMPH-ja me përkrahjen nga UN Habitat dhe ka për qëllim të përcjellë tek ministritë përkatëse dhe partnerët mbështetës për prezantim, diskutim dhe pasurim, ‘Programin e Banimit Social në Kosovë’ dhe gjithashtu për të rënë dakord mbi hapat e ardhshëm dhe interesimin përkatës për mbështetjen plotësuese të zotimeve të bëra nga Qeveria e Kosovës. /Telegrafi/