ARKEP: Serbët ende nuk kanë aplikuar për operatorin e tretë në Kosovë (Dokument)

Zyrtarisht, serbët ende nuk kanë shprehur interesim për të aplikuar për operatorin e tretë mobil në Kosovë, siç e parashikon marrëveshja për telekomin mes Prishtinës dhe Beogradit. Këtë e vërteton Ekrem Hoxha, kryetar i Autoritetit Rregullativ të Komunikimeve Elektronike dhe Postare (ARKEP).

“Nuk kemi asnjë aplikim/interesim konkret”, tha Hoxha përmes përgjigjeve elektronike.

Në bazë të marrëveshjes që e ka siguruar “KosovaPress”, operatori serb duhet të aplikojë më së largu deri më 15 nëntor të këtij viti. Ndërsa, koha kur operatori serb pajiset me licencë nga ARKEP, sipas marrëveshjes, bëhet më 15 janar të vitit 2016.

Po ashtu, në marrëveshje thuhet se ky autorizim do të dorëzohet në të njëjtën ditë kur kodi i ITU-së i jepet Kosovës. E, ky autorizim i përkohshëm nuk do të skadojë para datës 01 mars 2017, thuhet në marrëveshjen për telekomunikacion të arritur në muajin gusht mes Kosovës dhe Serbisë.

Kryetari i ARKEP, Ekrem Hoxha, tha se marrëveshja për telekomin parasheh që operimet në segmentin e telefonisë mobile do të jenë të kufizuara brenda infrastrukturës aktuale në terren, duke iu referuar pjesës veriore të vendit. Hoxha po ashtu tha se në marrëveshje janë të parapara afatet të cilat janë të ndërlidhura dhe të kushtëzuara me implementimin e pikave respektive.

Në dokumentin për telekomin, ndër të tjera thuhet se “për telefoninë mobile, autoritetet e Kosovës do t’i japin leje kompanisë se re me një autorizim të përkohshëm, nën kornizën rregullative të Kosovës, për operacione të tanishme dhe të kufizuara në infrastrukturën aktuale në terren. Ky autorizim i përkohshëm nuk do të përfundojë para janarit 2016. Autorizimi i përkohshëm do të përfundojë sapo autoritetet e Kosovës të nxjerrin një licencë të re të plotë dhe të pakufizuar të telefonisë mobile, si rezultat i një tenderi/ankandi. Tenderi do të organizohet në përputhje me standardet e BE-së.

Infrastruktura aktuale aktive e palëvizshme e telekomunikacionit e Ndërmarrjes së Re duhet të mirëmbahet rregullisht…

Lëshimi i autorizimit të përkohshëm: ky autorizim i përkohshëm do të dorëzohen te lehtësuesi i BE-së, më 01/01/2016 dhe të hyjë në fuqi vetëm atëherë kur të dorëzohet tek operatori. Lehtësuesi i BE-së do t’ia dorëzojë atë operatorit kur Kosovës t’i caktohet një kod tre-shifror nga ITU. Ky autorizim i përkohshëm nuk do të skadojë para datës 01/03/2017.

Ky autorizim do të dorëzohet në të njëjtën ditë kur kodi i ITU-së i jepet Kosovës”.