Opinione

A po bëhet Kosova Jerusalemi i Ballkanit?

Përmbajtja e bisedimeve, nuk mund të kuptohet ndryshe, pos bosnizim i Kosovës dhe se përpilimi i tij është bërë sipas skenarëve të njohura antishqiptare. Përballë realitetit që po krijohet, shqiptarët pas të gjitha atyre sakrificave që u detyruan të bëjnë, jo pa fajin e tyre, do të detyrohen të përballen serish me sfida shumë të rrezikshme, e që epilogu do të jetë vendimtar për të ardhmen e tyre në përgjithësi.

Shkalla e rrezikshmërisë së këtij paralajmërimi nga këto bisedime është shumë i madh, kur atij i shtohen edhe paralajmërimet kërcënuese që vijnë fuqiplote nga EULEX se do të ndërhyjnë pa asnjë mëshirë ndaj atyre që do të shprehin publikisht mospajtimin ndaj nëpërkëmbjes.

Është momenti i fundit që bashkësia ndërkombëtare ta kuptoj drejt, mirë dhe përfundimisht, se shqiptarët u çarmatosen, si popull i civilizuar që janë, këtë veprim të urtë e bënë nga bindja, se mos më në fund ajo çka përjetuan para syve të bashkësisë ndërkombëtare, do të kishte zgjuar ndërgjegjen e saj njerëzore dhe, më në fund do të shfrytëzonte rastin për t’i korrigjuar gabimet që u kishte bërë shqiptarëve në të kaluarën, duke e copëtuar Truallin etnik të tyre, për një qëllim të vetëm: kënaqjen e orekseve grabitqare të fqinjëve të tyre sllavo-grek. Është momenti i fundit që, si bashkësia ndërkombëtare, ashtu dhe servilët e saj vendor, t’ia vënë gishtin kokës dhe të rishikojnë sjelljet e tyre në raport me shqiptarët, para se t’i kalojnë kufijtë e durimit të tyre.

Po u kaluan këta kufij, pasojat do të jenë, jo vetëm të paparashikueshme, por edhe shumë vështirë të riparueshme, ndërsa përgjegjësia nuk do të mund t’u adresohet shqiptarëve. Po mundohemi tua bëjmë me dije këtij populli se ajo që është thënë dhe trumbetuar nga politikanët tanë nuk do jetë ashtu, por shumë më ndryshe, dikush pyet pse nuk duhet pranuar këto bisedime, sepse nuk e shpreh dhe nuk e respekton vullnetin e popullit të Kosovës. Në Kosovë jeton populli shqiptar, që përbën mbi 90 për qind të popullsisë së përgjithshme të Kosovës. Vullneti i shqiptarëve të Kosovës është që të jetojë i lirë dhe i pavarur, si edhe popujt e tjerë të Evropës, apo që do të ishte në interes të gjithë Evropës të bashkohej me Shqipërinë, si pjesë e popullit dhe e territorit shqiptarë.

Këto bisedime nuk e njohin Kosovën shtet të pavarure e sovran, të ndërtuar në parim qytetar dhe demokratike, por një kreatur shqiptaro-serbe. Kosova bëhet shtet jofunksionalë dhe jo efikas i detyruar për çdo gjë të hyjë në procesin e negociatave dhe marrëveshje të brendshme shqiptaro-serbe. Nuk respektohet parimi demokratik-një qytetarë një votë, dhe i marrjes së vendimeve me dy të tretat e votave. Sepse, Kosovën si territor e ndan dy entitet – Shqiptare dhe Serbe. Decentralizimi u bë në baza etnike dhe me qëllim që serbët e Kosovës të kontrollojnë dhe qeverisin në mënyrë autonome së paku një të katërtën e territorit të Kosovës. Me shpalljen e zonave të mbrojtura të monumenteve kulturore, historike e fetare serbe në Kosovë, zyrtarizohet propaganda serbe se shqiptarët janë shkatërrues së këtyre vlerave e nuk i jep krah të vërtetës historike, se pikërisht shqiptarët ishin mbrojtës së të këtyre monumenteve e vlerave gjatë shekujve.

Dobësia dhe mos efikasiteti i këtyre bisedimeve që nuk po merren me shqyrtimin e dëmeve të luftës, vrasjet, plagosjet, dhunimet, plaçkitjet, vjedhjet…dhe rrënimi i bazës materiale familjare dhe kombëtare nga regjimi i shteti të Serbisë. Zgjidhja që ofrohet tash nuk e bënë ndarjen përfundimtare ndërmjet Kosovës dhe Serbisë. Çështja e pazgjidhur drejt e Kosovës mbetet burim krize e konflikti në rajonin, duke rrezikuar paqen në këtë pjesë të Evropës dhe më gjerë. Falënderojmë Amerikën për ndihmën e madhe që i dha këtij populli gjithashtu edhe NATO-n që ndihmoj popullin shqiptar në momentet vendimtare kur luftohej për jetë a vdekje, mirëpo ne ende besojmë se Amerika do të ndihmoj proceset politik, të shqiptarëve për bashkim dhe vetëvendosje.

Mendimi politik evropian nuk është në gjendje të kuptojë se nëse në Evropën perëndimore konfliktet u zgjodhën me anë të integrimeve, në “skajin” e saj Ballkanin, ka një situatë të ndryshme prej asaj të konflikteve etnike nga Evropa perëndimore: trojet shqiptare mbahen ende të pushtuara dhe të kolonizuara. Një zyrtar evropian është cituar të ketë deklaruar para gazetarëve se bashkësia ndërkombëtare do të qëndrojë në Kosovë përgjithmonë, sepse Bashkimi Evropian nuk ka strategji dalëse nga Kosova, duke shtuar se do të ndërrojë vetëm natyra e pranisë ndërkombëtare.

Kërcënimet për një përsëritje të këtij problemi të ndarjeve të tokave shqiptare janë shumë afër duke pasur parasysh krejt ajo që mbështjell çështjen shqiptare është e errësuar. Problemi më delikat që monumentet historike që janë në Kosovë fitojnë një autonomi apo një minishtet. Një eksterritorialitet që në bazë të fjalorit politikë do të thotë se ato pjesë do të jenë jashtë Kosovës edhe pse ndodhen në Kosovë, ata tash kane 150 monumentet që ndodhën në Kosovë, kane fituar këtë të drejtë që do të thotë se gati 10 për qind të territorit të Kosovës nen juridiksionin serb dhe nuk mund të kemi qasje në këto pjesë. Decentralizimi ia mundësoj Serbisë ushtrimin e kontrollit në më shumë se 15 për qind të territorit të Kosovës prej rajonit të Anamoravës e deri ne Graçanicë, plus 18.9 për qind të territorit në veriun e Kosovës ku funksionojnë strukturat paralele të Serbisë. Por apetitet serbe për shtimin e territoreve nuk kanë pushuar.

Këtu kemi të bëjmë me fuqinë politike që ka misioni EULEX, i cili parasheh që çdo njëri që mendon më ndryshe se ai mund të suspendohet dhe nuk mund të merret asnjë vendim që atij nuk i shkon përshtati. Vëllezër kjo është tragjedia që është duke na pritur, ju ftojmë që me dinjitet të mbrohet e drejta jonë. Kosovën po e varrosin dhe po e bënë juridikisht si një Jerusalem të ri në Evropë. Forma shtetërore e Kosovës mbetet e papërcaktuar. Kosova fiton diçka përkohësisht, por humb përjetësisht pjesë që nuk i kthen më. Serbinë askush nuk do ta detyroj që ta heq Kosovën nga Kushtetuta si territor serb. Negociator që paguheni nga Kosova për t’ia bërë këtë Kirurgji tokësore, Kosova që tani po ju jep më shumë që mos të ja bëni këtë që po ja bëni…