A do të bëhet mjedra, ar i kuq edhe i Kosovës?

Polonia sivjet u bë prodhuesi më i madh i mjedrës në botë, duke e tejkaluar në këtë mënyrë Serbinë, e cila me vite e kishte këtë primat. Mjedrën këto dy shtete e shohin si produkt shumë me rëndësi dhe profitabil, sa që njihet edhe si ar i kuq. Kultivimi masiv i mjedrës lehtë është i mundur edhe në Kosovë, por duhet organizimi, thonë ekspertë.

Kosova njihet me deficit të madh tregtar, pasi shumica e produkteve importohen nga vendet e ndryshme. Problem i shumicës së prodhuesve vendorë, veç tjerash është edhe plasimi i produkteve nëpër tregje të huaja, për çka përveç emrit nevojitet edhe plotësimi i disa standardeve ndërkombëtare të kualitetit.

Por, në vendin tonë ka edhe mundësi tjera të prodhimit, me të cilat lehtë mund të plotësohen standardet ndërkombëtare dhe ajo që është ndoshta vështirë e besueshme, edhe më lehtë të eksportohen.

Njëra prej tyre është kultivimi i arit të kuq si quhet në disa vende, përkatësisht kultivimi i mjedrës, për çka nuk duhen shumë investime, por edhe kthimi i investimeve si dhe profiti arrihen në një afat të shkurtër.

Këtë për "Ferma Ime" e thotë eksperti i prodhimit të pemëve, Maxhun Shehaj. “Kostoja e ngritjes së një hektari mund të shkojë deri në 12 mijë euro, varësisht nga teknologjia apo origjina e materialit fidanor. Nëse fidanet blihen në Kosovë është më i lirë, ndërsa nëse blihen nga Anglia p.sh. është deri 80 cent një fidan“.

Eksperti Shehaj, i angazhuar në projektin e USAID-it “Mundësitë e Reja për Bujqësi” NOA, zbulon edhe mundësitë e fitimit nga një hektar të mbjellur me mjedër. “Kultivimi i mjedrës është shumë profitabil. Momentalisht çmimi i një kilogrami është 2 euro, që është një çmim shumë i mirë. Nga një hektar, mund të kultivohen rreth 15 mijë kg mjedër, që i bie me çmimin aktual, 30 mijë euro fitim bruto brenda një sezoni”.

Kësaj duhet shtuar edhe atë se jetëgjatësia komerciale e fidanëve është rreth 15 vite.

Se kultivimi i mjedrës është një biznes profitabil, e thotë edhe Avni Shabani nga Podujeva. Ai përmes firmës APC, kishte filluar të kultivojë mjedra në vitin 2007 dhe gradualisht ka rritur hapësirën e kultivimit, për shkak të kërkesave të vazhdueshme na jashtë. Ai për "Ferma Ime" thotë se tani ka të mbjellura 7 hektarë me mjedra dhe 99 për qind të sasisë eksporton. “Prodhimi ynë nuk mjafton për eksport, por mbledhim mjedër edhe nga kooperantët e tjerë dhe thuajse tërë sasinë e eksportojmë”, sqaron Shabani.

Eksportet kryesisht bëhen në vendet e Bashkimit Europian, duke filluar nga Gjermania, Austria, Holanda etj.

Ai thotë se ka mjaft hapësirë për prodhimin e mjedrës në Kosovë, por edhe hapësirë të mjaftueshme për eksport. “Tash kemi filluar një bashkëpunim me projektin NOA të USAID-it, edhe përmes Kuvendit Komunal të Podujevës, që t’i përkrahim fermerët e rinj të cilët kanë treguar interesim për të ngritë fusha të reja me mjedra dhe deri tani janë paraqit mbi 20 hektarë që planifikohet të mbillen me këtë kulturë në vitin e ardhshëm”, thotë ky kultivues dhe eksportues i mjedrës.

Profitin e sigurt me mjedër, e ka nuhatur edhe Geg Zefi, i firmes Bio-Buzmi nga Ferizaj.

Shabani thotë se sivjet për të është viti i parë i kultivimit të mjedrës dhe ka të mbjellur 10.000 fidane, në një hektarë. “Fidanët i kam fituar si grand nga projekti NOA i USAID-it. Është ky viti i parë i kultivimit dhe pres profit, pasi ashtu kam dëgjuar se ka treg të sigurt për këtë kulturë”. /FermaIme/Telegrafi/