Kompania e Becchettit, 300 mijë dollarë për Liri Berishën

Rreth 300 mijë dollarë ka paguar kompania “Energji” shpk e pronarit të “Agon Channel” Francesco Becchetit për fondacionin e bashkëshortes së ish-kryeministrit, Liri Berisha.

Në bilancin zyrtar të kompanisë “Energji shpk”, të siguruar nga gazeta “Tema”, pronari i saj ka deklaruar se shoqëria e tij ka paguar për fondacionin e fëmijëve shqiptarë të Liri Berishës, një shumë që shkon rreth 300 mijë dollarë.

Bëhet fjalë për kompaninë “Enegji shpk”, e cila sipas Prokurorisë, ka pasur rreth 7 milionë dollarë detyrim për të paguar tatimin mbi fitimin dhe nuk e ka bërë atë. Në bilancin përfundimtar për vitin 2013, rezulton se kjo shoqëri ka një fitim të deklaruar prej 706.177.512.00 lekë dhe në bazë të ligjit shqiptar, ajo i detyrohet shtetit të paguajë 70.617.751.20 lekë, të cilat sipas Prokurorisë nuk i ka paguar, duke devijuar të ardhurat nga kompania në një llogari tjetër, e cila penalizon dhe drejtoreshën e bankës që ka lejuar veprimin.

Kontributi i kësaj kompanie për fondacionin e Liri Berishës, është jo vetëm shumë i madh, por thuajse dhe i vetmi zë në “Sponsorizime dhe donacione” që ka bilanci.

Në zërin “Sponsorizime dhe donacione” kjo kompani ka deklaruar në zërin aktiv 23 246 129 lekë, nga të cilat nëse shikohet analiza e zërave të bilancit, 22 194 510 lekë i takojnë fondacionit të Liri Berishës në zërin aktiv dhe, 7 430 600 lekë në zërin pasiv.

Shuma është e jashtëzakonshme, po të kemi parasysh se fondacioni i Liri Berishës është fondacioni i vetëm që kjo kompani ka bërë donacione, dhe këto donacione mbyllen në vitin 2013, dhe nuk vijojnë më pas. Vëmendja ndaj kësaj kompanie u rrit ndërsa prokuroria e ka vënë nën akuzë për devijim të parave dhe evazion fiskal, ndërsa Berisha dhe djali i tij i dolën në mbrojtje menjëherë, duke akuzuar qeverinë se po e sulmon politikisht.

Faktet provojnë se Liri Berisha është përfituesja më e madhe dhe thuajse e vetmja nga donacionet e kësaj kompanie dhe kjo justifikon dhe mbrojtjen e zjarrtë të djalit dhe burrit të saj për këtë kompani. Berisha deklaroi se ishte sulm politik, ndërsa Shkëlzeni, që reagoi i pari, e quajti kompaninë tërësisht të pastër, dhe nëse ka detyrime fiskale.

Duke pare bilancin e deklaruar nga “Energji shpk” del se studioja “Tashko Pustina”, për gjithë shërbimet ndaj saj është paguar me 2 439 480 lekë, ose 100 herë më pak se Liri Berisha, e cila nuk i shet shërbime, por piktura. Nuk është e specifikuar si e ka paguar, por mendohet se një pjesë ka shkuar në blerje pikturash në ballot luksoze të Liri Berishës dhe ndoshta një pjesë në pagesa direkt në para, shkruan gazeta "Tema".