Njësia Speciale FIT në gjendje të mjerueshme

Ushqim i dobët, uji i keq, banjat e papastra, çarçafë të palarë dhe shumë gjëra tjera, kanë gjetur inspektorët e policisë në kampin “Vrella”, atje ku e kanë bazën Njësia Speciale Intervenuese FIT.

Njësia Speciale Intervenuese e Policisë së Kosovës nuk i ka kushtet edhe aq mirë. Në një raport të Inspektoratit Policor të Kosovës përshkruhen kushtet e jetës ku pjesëtarë të kësaj njësie gjenden.

Raporti që është përpiluar nga IPK, përfshin periudhën për vitin 2013 dhe në kampin “Vrella”, ku është vendosur Njësia speciale, i cili ka gjetur papastërti në ushqim dhe në higjienë.

Njësia Speciale dhe Drejtoria e Shërbimeve Shëndetësore e kanë vizituar së bashku me Institutin Kombëtar për Shëndetin Publik, ku edhe është konstatuar se burim i infeksionit të policëve specialë janë ushqimi dhe uji i pakontrolluar.

“Sipas dokumentacionit të prezantuar nga Departamenti shëndetësor, 25 pjesëtarë nga numri total 40 i pjesëtarëve të ekzaminuar, janë të diagnostikuar me Helicobakter Pylori dhe shumica me pengesa gastroenterologjike”.

Instituti Kombëtar i Shëndetit Publik ka hartuar raport nga inspektimi i datës 27 dhe 28 maj 2013 dhe ka dalë me këto rekomandime për Kampin “Vrella”; blerja e makinës për larjen e enëve dhe një dollapi të mbyllur ku ruhen enët e pastra; që grumbullimi i mbeturinave të ushqimit të bëhet në këndin kah dera e trapezarisë dhe jo në pjesën ku distribuohet ushqimi; që frigoriferi të pastrohet rregullisht dhe të përdoret vetëm për artikujt që kërkojnë temperaturë frigoriferi. /Tribuna/Telegrafi/