Komuna e Prizrenit vazhdon mbështetjen financiare për shërbimet e varrimit

Komuna e Prizrenit edhe sivjet do të vazhdojë bashkëpunimin me KRM “Ekoregjionin” sa i përket mbulimit të shpenzimit përkatësisht ofrimit të shërbimeve të varrimit.

Sipas praktikës tashmë disa vjeçare, Ekzekutivi komunal do të mbulojë shpenzimet e varrimit, derisa shërbimet përkatëse do të kryhen nga KRM “Ekoregjioni” në koordinim me Këshillin e Bashkësisë Islame në Prizren.

“Në prani të përfaqësuesve të Këshillit të Bashkësisë Islame në Prizren, kryetari Shaqir Totaj nënshkroi kontratën me KRM “Ekoregjioni” SH.A., për kryerjen e shërbimeve të varrimit në tërë territorin e Komunës së Prizrenit, që ka për qëllim përmirësimin dhe organizimin e këtyre shërbimeve për qytetarët”, thuhet në njoftimin e Komunës së Prizrenit, raporton Telegrafi.

Drejtori i Shërbimeve Publike, Çelë Lamaj ka bërë të ditur se në këtë mënyrë “vazhdon praktika e viteve të shkuara në mënyrë që qytetarët të lirohen nga barra e shpenzimeve të varrimit”.

“Kjo praktikë do të vazhdojë edhe sivjet, pra nuk ka ndryshime”, ka thënë Lamaj.

Ndërsa kryeshefi ekzekutiv i KRM “Ekoregjioni”, Burim Shala ka konfirmuar për Telegrafin se kjo kompani do të vazhdojë ofrimin e këtyre shërbimeve sikurse në vitet e shkuara bashkë me Këshillin e Bashkësisë Islame në Prizren, ndërkohë që shpenzimet do të mbulohen nga Komuna e Prizrenit.

“Shpenzimet e parapara për një varrim janë 290 euro, ndërkohë që gjatë vitit kryhen mbi një mijë raste të varrimit”, ka bërë të ditur Shala. /Telegrafi/