Milingonat nuk parakalojnë kurrë, ato kanë një ndjenjë trafiku dhe mund të zgjidhin sfidat e transportit urban

Profesorët e Universitetit të Trentos studiuan sjelljen e milingonave për të kuptuar se si këto insekte lëvizin në mënyrë efikase pa u penguar, edhe kur janë në grupe të mëdha.

Marco Guerrieri, profesor i specializuar në infrastrukturën rrugore dhe hekurudhore, dhe Nicola Pugno, profesor i mekanikës së trupave të ngurtë dhe strukturave, janë bashkautorë të këtij studimi.

Sjellja e milingonave ka frymëzuar fusha të ndryshme shkencore për shkak të aftësisë së tyre për të zgjidhur probleme komplekse. Gjatë lëvizjes, milingonat krijojnë rrjete të kryqëzuara që ngjasojnë me trafikun e automjeteve në autostrada, shkruajnë mediat.

Duke analizuar një shteg milingonash prej 30 centimetrash, që është 100 herë më i gjatë se trupi i tyre, dhe duke përdorur algoritme të mësimit të thellë për të ndjekur lëvizjet e tyre në video, studiuesit hartuan trajektoret, shpejtësinë dhe rrjedhën e lëvizjes së milingonave. Rezultatet tregojnë se milingonat përdorin strategji si formimi i kolonave, mbajtja e një shpejtësie të qëndrueshme dhe lëvizja pa parakalime për të shmangur bllokimet, edhe kur grupet janë të mëdha.

Sipas Guerrierit, milingonat janë një nga pak llojet që mund të menaxhojnë rrjedhat e trafikut në dy drejtime, të ngjashme me rrugët tona, por pa bllokime. Ai shtoi se milingonat ndjekin shtigjet e feromoneve që shënohen nga milingonat udhëheqëse, duke lëvizur në kolona me hapësira të vogla dhe pa parakaluar.

Nga milingonat që ecin në shtigje feromonesh deri te automjetet që lëvizin në korsitë e autostradave, sfida kryesore për të gjitha sistemet kolektive është shmangia e bllokimeve dhe vonesave, theksojnë studiuesit.

Hulumtimi tregoi se milingonat zgjidhin probleme komplekse të trafikut duke përdorur rregulla të thjeshta dhe vetëorganizuar, të cilat nuk imponohen nga jashtë, siç ndodh në trafikun tradicional. Këto rregulla burojnë nga kontakti i drejtpërdrejtë ose sinjalet kimike midis milingonave, duke e bërë sjelljen e tyre më bashkëpunuese sesa automjetet në rrugët konvencionale.

Studimi ofron disa kontribute kryesore. Së pari, identifikon variablat mikroskopike të trafikut që gjenden në rrjedhat e milingonave dhe analizon strategjitë kolektive që ato përdorin për të shmangur bllokimet. Bazuar në këto zbulime, studimi propozon strategji të rregullimit të trafikut të frymëzuara nga sjellja e milingonave.

Guerrieri sugjeron se sistemet e ardhshme të trafikut për automjetet autonome mund të frymëzohen nga sjellja e milingonave. Ndërsa milingonat “komunikojnë” përmes feromoneve, automjetet autonome mund të përdorin teknologji të avancuara komunikimi për të ndërvepruar me njëri-tjetrin dhe me infrastrukturën rrugore, duke formuar kolona të koordinuara. Kjo do t’u mundësonte të lëviznin në korsitë paralele me shpejtësi të lartë dhe distanca të vogla, duke përmirësuar efikasitetin e trafikut, nivelet e shërbimit dhe reduktuar emetimet e gazrave.

Megjithatë, studimi thekson edhe disa kufizime, përfshirë faktin që të dhënat për trafikun janë fokusuar vetëm në një lloj milingonash, gjë që kufizon mundësinë e përgjithësimit të rezultateve për të gjitha llojet. Gjithashtu, analiza është kryer në një seksion të drejtë të shtegut pa kthesa, kryqëzime apo zona konflikti mes rrjedhave. Për më tepër, teknologjia e automjeteve autonome është ende në zhvillim dhe nuk ka të dhëna empirike nga trafiku real për të mbështetur këto gjetje. /Telegrafi/