Manifestimi për inaugurimin e presidentit të SHBA-së, organizohet edhe nga nxënësit në Ferizaj

Donald Trumpi do të betohet gjatë ditës, si president i Shteteve të Bashkuara të Amerikës. Por në Komunën e Ferizajt, pikërisht në shkollën e fshatit të Vjetër, si katër vjet më parë është organizuar një ceremoni e nxënësve të shkollës “Muharrem Shemsedini”.

Faton Haxhisalihu, përfaqësues i fshatit, ka thënë për Telegrafin se fshati i tyre tashmë e ka traditë që çdo katër vjet organizon aktivitete të tilla sa herë që SHBA-ja zgjedh presidentin e ri.

Ai ka thënë se Kosova dhe Ferizaj është gjithmonë mirënjohës për SHBA-në, për mbështetjen që ua ka bërë qytetarëve gjatë kohës së luftës.

“I kemi vendosur 47 flamuj amerikan për nder të inaugurimit të presidentit të 47 të SHBA-së. Si qytetar të fshatit e kemi bërë tashmë traditë dhe do ta festojmë gjithmonë. Është një shqetësim se sivjet nuk kanë qenë të pranishëm pjestarët e KFOR-it amerikan edhe pse ne si këshill i fshatit ua kemi dërguar ftesën. Katër vjet më parë edhe pse ishte kohë pandemie, KFOR-i amerikan patën marrë pjesë në ceremoninë tonë”, ka thënë Haxhisalihu.

Kujtojmë, se Ceremonia zyrtare e inaugurimit të Trumpit do të zhvillohet pasdite brenda Kapitolit të SHBA-së, por kësaj here betimi i Trumpit do të bëhet në ambiente të mbyllura për herë të parë pas 40 vitesh për shkak të të ftohtit ekstrem.

Në këtë ceremoni të betimit janë ftuar udhëheqës të huaj, përfshirë edhe disa figura nga Kosova si: Ramush Raradinaj, Behgjet Pacolli, dhe Përparim Rama.

Po ashtu kujtojmë se gjatë fushatës së tij, Trumpi pati premtuar se do t’i japë fund luftës së Rusisë në Ukrain, megjithatë këshilltarët e tij kanë pranuar se çdo marrëveshje paqeje do të marrë së paku muaj.