Prezantuesja e famshme Wendy Williams që u diagnostikua me demencë frontotemporale thyen heshtjen: Po më kontrollojnë vazhdimisht, jam si në burg

Prezantuesja e njohur amerikane, Wendy Williams (60 vjeçe), ka folur mes lotësh për gjendjen e saj shëndetësore dhe kujdestarinë e detyruar në një intervistë të rrallë. Ajo i është drejtuar mikut të saj të vjetër, Don Lemon, në podkastin e tij, për të hedhur dritë mbi spekulimet lidhur me paaftësinë e saj të pretenduar.

“Jeta ime është bërë qesharake. Kam tre vite nën kujdestari. Për tre vite jam izoluar nga çdo gjë. Ndihem sikur jam në burg. Nuk mund të dal jashtë. E vetmja gjë që mund të bëj është të shikoj nga dritarja”, ka thënë Williams.

Kur Lemon e pyeti për gjendjen e saj shëndetësore, ai përmendi deklaratat e kujdestares së saj, Sabrina E. Morrissey, e cila kishte pohuar se Williams është “përherë e paaftë dhe vuan nga demenca”. Ky koment e shqetësoi dukshëm Williams, e cila shtoi: “Nuk e di se sa mund të flas pa u ndëshkuar”.

Ajo gjithashtu shprehu frikën e saj: “Nuk do të mund të takoj babanë tim, nuk do të mund të bëj asgjë. Do të mbetem e mbyllur në këtë ‘burg’ për pjesën tjetër të jetës, nëse flas shumë për kujdestarinë time”. Kujdestaria, e cila u vendos në maj të vitit 2022, ka bërë që familja e saj të mos ketë informacione për vendndodhjen e saj, sipas raportimeve të New York Post.

Williams e bëri të qartë se nuk është aspak e kënaqur me situatën aktuale. “Nuk jam mirë. Jeta ime është kaos. Kjo situatë me kujdestarinë është… ju lutem, më dëgjoni, jam e izoluar. Ndihem si në burg, sikur po përpiqen të kontrollojnë gjithçka që bëj”, tha ajo.

Në një paraqitje tjetër të enjten në emisionin “The Breakfast Club”, Williams ndau detaje tronditëse për situatën e saj. Ajo pretendoi se është e “burgosur” në një qendër për të moshuarit në New York, pa qasje në telefon ose laptop, duke e cilësuar situatën si “abuzim emocional”.

Në vitin 2023, Wendy Williams u diagnostikua me demencën frontotemporale dhe afazi. Kujdestarja e saj, Sabrina E. Morrissey, deklaroi në fund të vitit të kaluar se gjendja e saj është përkeqësuar, ndërsa avokatët e Wendy-t konfirmuan se ajo është shpallur person me paaftësi të përhershme kognitive. /Telegrafi/