O’Brien: Kosova dhe Serbia duhet të bashkëpunojnë për integrimin evropian, një zgjidhje është e mundur

Ndihmës Sekretari i Departamentit Amerikan të Shtetit për Evropën dhe Euroazinë, James O’Brien, ka komentuar situatën e shqiptarëve serbë në Kosovë dhe mundësinë e një zgjidhjeje të qëndrueshme mes Kosovës dhe Serbisë, për të cilën ai është optimist.

“Mendoj se është e mundur,” tha O’Brein, kur u pyet nëse serbët në Kosovë mund të jetojnë si qytetarë evropianë nën qeverisjen e Albin Kurtit.

Ai theksoi se shumë shtete evropiane janë përballur me probleme të ngjashme në të kaluarën, duke përmendur lidhjet historike dhe kulturore të grupeve të ndryshme etnike nëpër Evropë.

Sipas tij, përpjekjet e Miroslav Lajçak dhe ekipit të tij në përmirësimin e dialogut mes palëve kanë sjellë një vizion të mundshëm për një zgjidhje të drejtë dhe të qëndrueshme për serbët në Kosovë.

O’Brein në një intervistë për median serbe “Kurir” , gjithashtu theksoi rëndësinë e një zgjidhjeje për Kosovën, e cila, sipas tij, rrezikon të izolohet nga procesi i integrimit evropian.

Ai bëri të qartë se për të arritur këtë zgjidhje, të dyja palët duhet të investojnë më shumë dhe të krijojnë kushte për një bashkëpunim afatgjatë, shkruan Telegrafi.

“Konkluzioni mes Kosovës dhe Serbisë është se ekziston një mënyrë normale evropiane për zgjidhjen e këtyre çështjeve. Vitet e fundit, liderët duhej të binin dakord për çdo hap të vogël, falë të cilit çdo hap kishte një rëndësi të madhe politike. Sot, me Bashkimin Evropian më aktiv në rajon, të dyja vendet e kuptojnë se mund të bëjnë disa gjëra për të lehtësuar zgjidhjen e problemit në Kosovë. Ata duhet ta bëjnë këtë për hir të integrimit të tyre evropian dhe jo si pjesë e ndonjë negociate speciale”, tha O’Brein.

Ndihmës Sekretari amerikan përmendi gjithashtu qështjen e tensioneve në veri të Kosovës, ku u shpreh se autorët e dhunës duhet të mbajnë përgjegjësi.

“Kjo duhet të krijojë një hapësirë ​​në të cilën do të dëgjohet zëri i serbëve në Kosovë, veçanërisht në veri. Në këtë kontekst, presidenti më inkurajoi duke thënë se autorët e dhunës në veri të Kosovës do të mbajnë përgjegjësi. Ne gjithashtu bashkëpunojmë me autoritetet në Prishtinë që edhe ato të sigurojnë përgjegjësi dhe sundim të ligjit. Pra, ne jemi duke punuar në të dyja anët, por sa i përket Serbisë, kjo do t’u mundësojë serbëve në Kosovë që të kenë zërin e tyre, duke e ditur në të njëjtën kohë se kanë mbështetjen e të tjerëve, në mënyrë që edhe ata të pyesin se si duan të jetojnë.”, u shpreh ai.

Përsa i përket marrëdhënieve dypalëshe mes SHBA dhe Serbisë, O’Brien tha se aspekti i parë është i lidhur me Kosovën.

“Sa u përket marrëdhënieve Amerikë- Serbi, kemi dy aspekte. Njëri është i lidhur me Kosovën. Ne duam që serbët, si komunitet në Kosovë, e veçanërisht në Veri, të kenë zërin e tyre. Jo të flasim në një mënyrë apo tjetër ashtu siç u thotë një qytet apo një qytet tjetër”, u shpreh O’Brein.

Ai theksoi rëndësinë e forcimit të dialogut strategjik, i cili ka mbështetje nga administrata demokratike dhe republikane në SHBA.

“Për sa i përket marrëdhënieve dypalëshe, ajo që njoftuam me ardhjen e ndihmës sekretarit të shtetit Richard Verma është se do të kemi një dialog strategjik me qeverinë serbe. Ne mendojmë se është e rëndësishme ta shpallim këtë tani, në fund të administratës së Bidenit, sepse ne donim të tregonim se si administrata demokratike dhe republikane mbështesin një marrëdhënie të fortë dypalëshe. Ne nuk duam të duket se njëra apo tjetra palë po merr përgjegjësi, sepse në Amerikë të dyja palët besojnë se një marrëdhënie e fortë është e rëndësishme si për vendin tonë ashtu edhe për Serbinë. E ardhmja është e ndritshme dhe ne duhet të punojmë për problemet që ekzistojnë”, tha O’Brein. /Telegrafi/