Gjatë vitit 2024, qyteti i Tetovës ka pasur 94 ditë me ajër të ndotur

Gjatë vitit 2024 ka pasur 94 ditë me ajër të ndotur, gjegjësisht tejkalim të kufirit të lejuar prej 50 grimcave PM10 për metër kub, sipas raporteve për të gjithë 12 muajt e vitit të kaluar të sistemit shtetëror për monitorim automatik të cilësisë së ajrit për qytetin e Tetovës.

Sipas standardeve botërore shëndetësore, në një vit kalendarik nuk duhet të ketë më shumë se 35 ditë me ajër të ndotur.

Vitin e kaluar, muajt më të ndotur ishin janari dhe shkurti, kur kishte 22 ditë tejkalim të vlerës së lejuar kufi prej 50 grimcave PM10 për metër kub në 24 orë.

Ajri i ndotur kishte edhe në dhjetor – 18, nëntor – 16, tetor – gjashtë dhe prill – një.

Gjatë pesë muajve – nga maji deri në shtator, nuk ka pasur asnjë ditë të tejkalimit të vlerës kufi me grimcat e dëmshme PM10.

“Nuk ka asnjë përqendrim minimal të PM10 që është i dobishëm për shëndetin. Edhe përqendrimet më të vogla janë të dëmshme për trupin e njeriut. Tani duhet të luftojmë që të kemi ajër edhe më të pastër, si në vendet e Bashkimit Evropian, ku kufiri për grimcat e dëmshme PM10 është vendosur në 25 në vend të 50 si në vendin tonë”, theksoi Dr. Ratko Davidovski, specialist i higjienës dhe ekologji shëndetësore në Qendrën për shëndet publik – Tetovë.

Në vitin 2023 kishte 89 ditë me ajër të ndotur, në vitin 2022 108 ditë. Në vitin 2021 ka pasur 132 ditë me ajër të ndotur, ndërsa në vitin 2020, nga 366 ditë, 138 kanë qenë me ajër të ndotur në Tetovë.

Banorët e Tetovës janë përballur më së shumti me ajër të ndotur në vitin 2015, duke pasur parasysh se prania e lartë e grimcave të dëmshme PM10 ka pasur edhe në 350 nga 365 ditë.